काठमाडौं । चिसो बढेसँगै तराईका जिल्लामा हुस्सु र कुहिरो लाग्नेक्रम बढेको छ । बिहान अबेरसम्म हुस्सु र कुहिरो लाग्दा बढी चिसो हुने गरेको छ । 

कतिपय दिनमा दिनभर पनि घाम नलाग्दा चिसो झन् धेरै हुने गरेको छ । यस्तो अवस्थामा तराई भूभागको जनजीवन नै प्रभावित हुने गरेको छ । 

सरकारले हुस्सु कुहिरोबाट सुरक्षित रहन आग्रह गरेको छ । स्वास्थ्य तथा जनसंख्या मन्त्रालयले तराईका भूभागमा हुस्सु र कुहिरो रहेकाले यसबाट जोेगिन अनुरोध गरेको छ । 

चिसोबाट बच्न शरीरको सबै भाग ढाक्ने गरी बाक्लो तथा न्यानो लुगा लगाउन मन्त्रालयले आग्रह गरेको छ । 

बालबालिका, वृद्धवृद्धा, गर्भवती महिला तथा दीर्घ रोगीहरूलाई चिसोबाट बचाउन विशेष ख्याल गर्नुपर्ने पनि मन्त्रालयले जनाएको छ । 

“आमाको दूध खाने बच्चालाई नियमित रूपमा स्तनपान गराऔं । तातो तथा पोषिलो झोल पदार्थहरू प्रशस्त मात्रामा सेवन गरौँ । धूमपान तथा मद्यपान नगरौँ,” मन्त्रालयले भनेको छ । 

स्वास्थ्य सम्बन्धी कुनै समस्या जस्तैः ज्वरो आएमा, झाडा पखाला लागेमा, दम बढेमा, खोकी लागेमा, घ्यारघ्यार भएमा, श्वास फेर्न कठिनाई भएमा तुरुन्त स्वास्थ्य संस्थामा सम्पर्क गर्न मन्त्रालयको आग्रह छ । 

सुत्ने कोठामा आगो, हिटर, मकल, कोइला व्रिकेट आदि बालेर  झ्याल ढोका बन्द गरेर नसुत्न पनि मन्त्रालयले सचेत गराएको छ । 

यदि, त्यसो गरेमा श्वास फेर्न नसकी निसासिएर मृत्यु समेत हुनसक्ने मन्त्रालयले जनाएको छ । 

आगो बालेको ठाउँमा बच्चालाई एक्लै नछोड्न पनि मन्त्रालयले सचेत गराएको छ ।

कोठा न्यानो पार्नुपर्ने तर पर्याप्त हावा ओहोरदोहोर हुने व्यवस्था भने गर्नुपर्ने मन्त्रालयले जनाएको छ ।