काठमाडौं । काठमाडौं विश्वसम्पदा शिखर सम्मेलन सम्पन्न भएको छ । सम्मेलनबाट पाँचबुँदे ‘केएचएस समिट २०२५’ घोषणापत्र जारी गरिएको छ ।

सहिद गंगालाल फाउन्डेसन नेपालले सम्मेलन आयोजना गरेको थियो । लुम्बिनी बौद्ध विश्वविद्यालयको बुद्ध अध्ययन संकाय, डीनको कार्यालयको शैक्षिक र प्राविधिक सहयोगमा कार्यक्रम आयोजना गरिएको थियो ।

घोषणापत्रमा पर्यटन क्षेत्रको पुनरुत्थान र बौद्ध शिक्षाको विकास गर्न सामूहिक प्रयासको आवश्यकता औँल्याइएको छ । “हामी मिलारेपाका पवित्र गुफादेखि लिएर नेपालको आध्यात्मिक, सांस्कृतिक र वास्तुकला सम्पदाको संरक्षण र प्रवर्द्धन गर्न समर्पित छौँ,” घोषणापत्रमा भनिएको छ ।

आध्यात्मिक पर्यटनको सम्भाव्यता, वास्तुकलाको महत्त्व र चोरी भएका सांस्कृतिक कलाकृतिलाई फिर्ता ल्याउने र उचित पुनर्स्थापना गर्न पहल गर्ने प्रतिबद्धता जनाइएको छ । “हामी नेपालको मूर्त र अमूर्त सांस्कृतिक सम्पदाको संरक्षण र पुनरुत्थान गर्न प्रतिबद्ध छौँ,” घोषणापत्रमा भनिएको छ ।

काठमाडौं उपत्यकाको ऐतिहासिक पहिचान, वज्रयानको चर्यागीता र चर्यान्त्यको समृद्ध परम्परा, कीर्तिपुरको बौद्ध वास्तुकला र साहित्यको अनुपम मिश्रणको संरक्षण गरिने घोषणापत्रमा जनाइएको छ ।

“हामी पाटनको भूकम्पपछिको पुनर्स्थापनामा परम्परागत शिल्पकला, लोकेश्वर पूजासँग जोडिएको लोप हुँदै गएको उपोषण व्रत परम्परा र नेवार कारिगरहरूको उत्कृष्ट रिपोस कलालगायत नेपालको समृद्ध सांस्कृतिक सम्पदाको संरक्षण, पुनरुत्थान र प्रवर्द्धनका लागि वकालत गर्छौँ,” घोषणापत्रमा भनिएको छ ।

दक्षिण एसियाको समृद्ध सांस्कृतिक, ऐतिहासिक र सामाजिक विविधतालाई महत्त्व दिँदै भावी पुस्ताका निम्ति यी सम्पदाको संरक्षण र प्रवर्द्धन गरिने घोषणापत्रमा जनाइएको छ । यसका निम्ति निकट भविष्यमा दक्षिण एसियाली सम्पदा शिखर सम्मेलन आयोजनाको घोषणा पनि गरिएको छ ।