काठमाडौं । पिंगलास्थानस्थित होटेलमा मृत फेला परेकी सुस्मिता खड्काको मृत्युको कारण अझै खुलेको छैन । ओखलढुंगाका देवबहादुर थापासँगै वाग्मती होटेलको ३०८ नम्बर कोठामा बस्न पुगेकी खड्काको शव बुधबार फेला परेको थियो ।

उनीसँगै बस्दै आएका २३ वर्षीय थापा भने फरार छन् । प्रहरीले उनको खोजी जारी राखेको छ । 

मृत भेटिएकी सुस्मिताको शरीरको बाहिरी भागमा कुनै चोटपटक छैन । तर, उनीसँगै बसेका युवा भागेका कारण उनको हत्या भएको प्रहरीको आशंका छ ।

प्रहरीले शव पोष्टमार्टमका लागि त्रिवि शिक्षण अस्पताल महाराजगन्ज पठाएको छ । तर, दुई दिनसम्म पनि पोष्टमार्टम रिपोर्ट नआउँदा उनको मृत्युको कारण खुल्न नसकेको हो । जिल्ला प्रहरी परिसर काठमाडौंका एसपी नवराज अधिकारीले पोष्टमार्टम रिपोर्ट आइनसकेको बताए ।

अनुसन्धानमा खटिएका प्रहरीका अनुसार सुस्मिताको मृत्यु भएपछि हाल फरार रहेका थापाले बाहिरबाट चाबी लगाएर भागेका थिए । फरार रहेका थापा मंसिर ३० गते मात्रै जापानबाट काठमाडौं आएको खुलेको छ । उनी बिहीबार फर्किने तयारीमा थिए ।

प्रहरीले थापाको ट्राभल रोक्का राख्न अध्यागमन कार्यालयलाई पत्राचार गरिसकेको छ । प्रहरीका अनुसार सुस्मिता समेत जापान जाने तयारीमा थिइन् ।