काठमाडौं । सेमिफाइनलमा एटलान्टाविरुद्ध २–० को जित निकाल्दै इन्टर मिलान इटालियन सुपर कपको फाइनलमा प्रवेश गरेको छ ।

बिहीबार राति अल अवाल पार्कमा इन्टरलाई जित दिलाउन दुवै गोल डेन्जेल डम्फ्रिजले गरे । इन्टरले दुवै गोल दोस्रो हाफमा गरेको हो ।

खेलको ४९औँ मिनेटमा डम्फिजले गोल गर्दै इन्टरलाई घरेलु समर्थकमाझ अग्रतामा राखेका थिए । ६१औँ मिनेटमा डम्फ्रिजले नै इन्टरको अग्रता दोब्बर बनाए । यसपछि थप गोल नहुँदा इन्टरले २–० को जितसहित फाइनल यात्रा तय गरेको हो ।

इन्टरले अब उपाधिका निम्ति युभेन्ट्स र एसी मिलानबीचको विजेतासँग प्रतिस्पर्धा गर्नेछ । दोस्रो सेमिफाइनल आज राति १२ः४५ बजे सुरु हुनेछ । प्रतियोगिताको फाइनल जनवरी ७ मा हुने तालिका छ ।