पर्सा । चालु आर्थिक वर्षको पाँच महिनामा वीरगन्जबाट धानचामलको आयात बढेको छ । पाँच महिनामा तीन अर्ब ९३ करोड ६३ लाख २० हजार रुपैयाँको धान आयात गरिएको वीरगन्ज भन्सार कार्यालयले जनाएको छ ।

गत आर्थिक वर्षको सोही अवधिको तुलनामा चालु आवमा धान आयात ६०.२८ प्रतिशतले बढेको छ । राजस्व संकलनको आधार पनि १४५.२३ प्रतिशतले बढेको छ । गत आवको पाँच महिनामा दुई अर्ब ४० करोड ३१ लाख ६४ रुपैयाँबराबरको धान आयात गरिएको थियो ।

चालु आवको पाँच महिनामा ९२ करोड ८० लाख ९० हजार रुपैयाँबराबरको ८८ लाख ६६ हजार ५४० किलोग्राम चामल आयात गरिएको छ । गत आवको सोही अवधिको तुलनामा चालु आवमा चामल आयात ५४.१२ र राजस्व संकलनको आधारमा २०.८८ प्रतिशतले वृद्धि भएको छ । रासस