काठमाडौं । नेपाली  कथानक चलचित्र ‘११ः५५’ (डु नट ट्रस्ट एनिवान) को प्रदर्शन मिति घोषणा गरिएको छ । चलचित्रको फर्स्टलुक पोस्टर सार्वजनिक गर्दै चैत ८ गतेलाई प्रदर्शन मिति घोषणा गरिएको छ ।

पोस्टरमा सिनेमाका मुख्य कलाकार महेश त्रिपाठी, सृष्टि श्रेष्ठ, करिष्मा श्रेष्ठ, एमएस अग्रज र डेव्यु अभिनेता सागर खनाल फिचर्ड छन् । पोस्टरले क्राइम थ्रिलर जानरामा चलचित्र निर्माण भएको प्रष्ट पारेको छ । 

पोस्टरमा केही नयाँपन देखिएको छ । जानरा प्रष्ट्याउन पोस्टर सफल भएको छ । पेस्तोलभित्र चलचित्रका कलाकार छन् । पेस्तोलका सबै भागमा गरी मुख्य कलाकार अटाएका छन् । 

यसले यो चलचित्र क्राइम थिलर भएको र पेस्तोल र बन्दुकको अधिक प्रयोग गरिएको अनुमान लगाउन सकिन्छ । 

चलचित्रमा अभिनेता बुद्धि तामाङ र विशाल पहारीको पनि अभिनय छ । 

चलचित्रको लेखन तथा निर्देशन केशव पाण्डेले गरेका हुन् । यो उनको डेव्यु निर्देशकीय चलचित्र हो । निर्देशक पाण्डेसँगै एमएस अग्रज र शेखर ज्ञवालीको लेखन छ ।

अल्मोडा राना उप्रेतीको संगीत, कबिराज गहतराजको कोरियोग्राफी, देव महर्जनको द्धन्द्व निर्देशन, राजेन्द्र मोक्तानको कलर, शैलेश श्रेष्ठको साउन्ड डिजाइन तथा मिक्सिङ छ । 

प्रद्युमन मिश्रको डीओपी, रामशरण उप्रेतीको सिनेमेटोग्राफी, पासाङ दावा शेर्पाको सम्पादन र सुवासराज काफ्ले सिनेमामा प्रोडक्सन डिजाइनरको रुपमा रहेका छन् ।

चलचित्रमा श्याम शर्मा र सरोजा शर्माको लगानी छ । सिनेमाका कार्यकारी निर्माता एमएस अग्रज हुन् ।