काठमाडौं । नेकपा (माओवादी केन्द्र)का उपमहासचिव जनार्दन शर्माले पार्टीभित्रको बहसलाई नकारात्मक रूपमा लिने चिन्तन हाबी हुँदै गएको बताएका छन् । १३२औँ माओ दिवसका अवसरमा बिहीबार काठमाडौंमा आयोजित एक कार्यक्रममा उनले पार्टीभित्रको बहस कमजोर हुँदै गएको बताए ।

“आज पार्टीभित्र वैचारिक बहसभन्दा गठबन्धनका बहसले प्राथमिकता पाउने गरेका छन् । वैचारिक बहस कमजोर बनेका छन्, यसलाई माथि उठाउनुपर्नेछ,” उनले भने ।

शर्माले पार्टीभित्रको बहसलाई सकारात्मक रूपमा लिनुपर्ने धारणा राखे । “पार्टीमा वैचारिक आधारमा नीति, योजना, कार्यक्रममा माओले भनेजस्तै एकरूपमा ल्याउनुपर्छ । सही विचारद्वारा निर्देशित भएर अघि बढ्नुपर्ने आवश्यकता छ । पार्टीभित्रको बहसलाई स्वाभाविक र अनिवार्य रूपमा लिनुपर्छ,” उनले भने, “यदाकदा बहसलाई दुत्कार्ने गरिन्छ । पार्टीभित्रको बहसलाई नकारात्मक रूपमा लिने गरिन्छ । पार्टीभित्रको बहसलाई सकारात्मक रूपमा लिनुपर्छ । माओले पनि सयौँ फूल फुल्न दिनुपर्छ भन्नुभएको थियो ।”

माओले उनको पार्टीको सातौँ महाधिवेशनमा अल्पमतलाई सम्मान गरेको शर्माले सुनाए । त्यो विषय नेपाली कम्युनिस्टले सिक्नुपर्नेमा उनले जोड दिए ।

उनले सुखसुविधा र सम्पत्ति आर्जन गर्दै जाने विकृति कम्युनिस्ट आन्दोलनमा हाबी हुँदै गएको बताए । “सुखसुविधातिर लहसिने, सम्पत्ति आर्जन गर्ने प्रवृत्ति हाबी हुँदै गएको छ । कम्युनिस्ट आन्दोलनभित्रका विचलनका रूपमा यी कुरा देखिइरहेका छन् । जनसंगठन स्वतन्त्र, स्वायत्त रूपमा अघि बढ्न सकेका छैनन्, मृत प्रायः अवस्थामा देखिन्छन्,” उनले भने ।

उनले जनयुद्धपछि वर्गचेतना हराउँदै आएको बताए । आफूहरूले उठाएको मुद्दा ओझेलमा पर्ने हो कि भन्ने आशंका उनले व्यक्त गरे । उनले गुटफुट र विभाजनको अन्त्य गर्दै एकतातर्फ लाग्नुपर्ने आवश्यकता औँल्याए । वैचारिक बहसलाई सशक्त बनाउनुपर्ने भनाइ शर्माको छ ।