काठमाडौं । विश्व प्रसिद्ध टेलिभिजन कार्यक्रम ‘सार्क ट्यांक’ नेपाल भित्रिएको छ । हिमालय टेलिभिजनले ‘सार्क ट्यांक नेपाल’ ल्याएको हो । राजधानीमा सोमबार पत्रकार सम्मेलनमार्फत कार्यक्रम ‘सार्क ट्यांक’ नेपाल र सार्क (निर्णायक) सार्वजनिक गरिएको हो ।

सार्क नेपाली संस्करणमा आईएमई ग्रुपका सह–संस्थापक हेमराज ढकाल, निम्बस होल्डिङका निर्देशक आनन्द बगरिया, टोयोटा नेपालकी प्रबन्ध निर्देशक ऋतुसिंह वैद्य, पद्मज्योति ग्रुपका निर्देशक सौरभ ज्योति र अग्नि ग्रुपका अध्यक्ष क्याबिनेट श्रेष्ठ रहेका छन् ।

नेपालमा यो कार्यक्रम सुरु गर्न सोनी पिक्चर्ससँग तीन वर्षअघि नै सम्झौता गरिए पनि विविध कारणले तीन वर्षपछि मात्रै सुरु गर्न लागेको हिमालय टिभीका कार्यकारी निर्देशक श्याम कँडेलले जानकारी दिए ।

“‘सार्क ट्यांक’ विश्वभरका ५३ देशमा प्रसारण भइसकेको र आजदेखि नेपाल यसको ५४औँ राष्ट्रका रूपमा थपिएको छ,” उनले भने, “नेपालजस्तो सानो भूगोल र जनसंख्याका कारण व्यवसायीले आफ्नो क्षमता प्रस्ट देखाउन सकेका छैनन् । यही कारण, यस्तो कार्यक्रम नेपाललाई थप आवश्यकता महसुस गरिएको हो ।”

‘सार्क ट्यांक’ले नेपालमा लगानीको वातावरण सिर्जना गर्ने मात्र होइन, देशभित्रै रोजगारीका नयाँ अवसर पनि दिने विश्वास गरिएको छ । यस कार्यक्रमले नेपाली व्यवसायहरूलाई अन्तर्राष्ट्रिय बजारसँग जोड्न सहयोग गर्ने कँडेलले उल्लेख गरे ।

एउटा एपिसोडमा पाँचजना उद्यमी गरेर कुल २० एपिसोडमा १०० जना उद्यमीले आफ्नो व्यवसाय र उद्यमशीलताको आइडिया पिच गर्ने बताइएको छ ।

सन् २००१ मा जापानको निप्पोन टिभीमा ‘मनी टाइगर्स’को रूपमा सुरु भएको यो सो अहिले विश्वकै ठूलो व्यावसायिक रियालिटी टिभी सो बनेको छ । सोनी पिक्चर्स टेलिभिजनले विश्वभर वितरण गर्दै आएको यो सोको नेपाल संस्करण ५४औँ फ्रेन्चाइज हो ।

सोका जजमार्फत ३५ देखि ४० करोड रुपैयाँ लगानी उद्यमीलाई जुटाइदिने जनाइएको छ । हिमालय टिभीमा आगामी तीन महिनाभित्र प्रसारणको अपेक्षा राखिएको कार्यक्रमको छायांकन फागुनदेखि गर्ने तयारी छ । कार्यक्रमको छायांकन नयाँ बानेश्वरस्थित एभरेस्ट होटलमा हुनेछ ।