काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले वर्तमान सरकार ढल्छ भन्नु काग कराएजस्तै भएको टिप्पणी गरेका छन् । आइतबार सिंहदरबारमा मन्त्रिपरिषद् बैठकका निर्णय सुनाउने क्रममा सञ्चारकर्मीले सोधेका प्रश्नको जवाफ दिँदै उनले वर्तमान सरकार आउँदो निर्वाचनसम्मै जाने जिकिर गरे ।

“...काग त कराउँदै गर्छ, पिनास सुक्दै गर्छ । हात्ती लम्किँदै गर्छ, कुकुर भुक्दै गर्छ । यो यस्तै हो,” उनले भने, “सरकार गिर्छ, सरकार गिर्छ भनेको काग कराएजस्तै हो । यो सरकार चलिरहन्छ ।”

उनले वर्तमान सरकार बनेको मन नपराउनेले नै यो ढल्ने भ्रम फैलाएको आरोप लगाए । राष्ट्रिय संकट निवारणका निम्ति दुई राजनीतिक दलबीच सहमति भएकाले सरकार ०८४ सम्मै टिक्ने उनले दाबी गरे ।

“सरकार बनेको दिनदेखि दुईवटा कुरा चलिरहेको हुन्छ, यो सरकार ढल्दैन र यो सरकार ढल्छ भन्ने । सबै पार्टीले छोडेर गए पनि दुई ठूला राजनीतिक दलहरू मिलेका छौँ, त्यसैले यो सरकार ढल्दैन । किनभने, १६७ सिट त हुन्छ,” उनले भने ।

उनले अगाडि भने, “तेस्रो, चौथो पार्टीलाई गुहारीराख्न परेन । सांसदहरूको चाकडी गरिरहनु परेन, मन्त्री, पार्टीका नेताहरूलाई फकाइराख्नु परेन । राष्ट्रिय संकट निवारणका लागि हामी दुईवटा पार्टी भइरहनुपर्छ भन्ने ठानेसम्म यो सरकार ढल्दैन ।” न्युज एजेन्सी नेपाल