काठमाडौं । जिल्ला प्रहरी परिसर काठमाडौंको टोलीले आपराधिक समूहलाई पक्राउ गरेको छ । गएको शुक्रबार दरबारमार्गस्थित लिक्विड लाउञ्ज बारमा एक युवकमाथि कुटपिट गरेपछि शनिबार (हिजो) उनीहरूलाई पक्राउ गरिएको प्रहरीले जनाएको छ ।

पक्राउ परेकाहरू विभिन्न आपराधिक गतिविधिमा संलग्न रहेको खुलेको छ । पक्राउ पर्नेमा काभ्रेको रोशी गाउँपालिकाका कुलध्वज तामाङ, काभ्रेकै भुल्लुका लालबहादुर तामाङ, काभ्रेकै मिलन लामा, सुलभ पहरी, युवराज लामा छन् ।

यस्तै, मोरङको उर्लाबारीका डम्बरबहादुर कार्की, सिन्धुपाल्चोकका दावा तामाङ र काभ्रेका शक्ति लामालाई परिसरको विशेष टोलीले पक्राउ गरेको प्रहरीले जनाएको छ ।

पक्राउ परेकाविरुद्ध काठमाडौं प्रहरीले ज्यान मार्ने उद्योगमा मुद्दा चलाएर अनुसन्धान थालेको छ ।

उनीहरूले बैतडीका रमेश भट्टमाथि शुक्रबार राति बारमा मरणासन्न हुने गरी कुटपिट गरेका थिए । पक्राउ परेका कुलध्वज यसअघि समेत ज्यान मार्ने उद्योग र डाँकाचोरीमा जेल सजाय पाएर छुटेको खुलेको छ । सुजन पनि ज्यान मार्ने उद्योगमा पक्राउ परेर छुटेका थिए ।

राजनीतिको खोल ओढेर अपराधकर्ममा
प्रहरीका अनुसार, पक्राउ परेका मध्ये कुलध्वज तामाङ नेपाली कांग्रेजको भ्रातृसंगठन तरुण दलका केन्द्रीय सदस्य रहेको खुलेको छ । उनी अपराध कर्म हुँदै राजनीतिमा प्रवेश गरेका हुन् ।

०६९ सालमा दरबारमार्गकै एउटा क्लबमा युवकमाथि कुटपिट गरेको आरोपमा लालध्वजविरुद्ध ज्यान मार्ने उद्योगमा मुद्दा चलाइएको प्रहरीको अभिलेखमा उल्लेख छ । उनी ०७२ सालमा काभ्रेमै बुद्धचित्तको माला लुटपाटको घटनामा ११ महिना जेल बसेर छुटेको खुलेको छ ।

उनीबाहेक मिलन लामा पब्लिक युथ क्याम्पसको स्वतन्त्र विद्यार्थी युनियनका उपसभापति हुन् । सुलभ पहरी भुल्लु गाउँपालिकाको तरुण दलका अध्यक्ष र युवराज लामा तरुण दल काभ्रे जिल्ला सदस्य हुन् ।

सिन्धुपाल्लोचका दावा समेत जुगल गाउँपालिकाको तरुण दलको अध्यक्ष रहेको खुलेको छ । अपराधकर्मबाट जोगिन उनीहरू राजनीतिको ओत लागेको प्रहरीको भनाइ छ ।