स्ट्रासबर्ग (फ्रान्स) । युरोपेली संघ (ईयू)ले शासक बसर अल–असदको पतनपछि सिरियाको नयाँ नेतृत्वसँग ‘रचनात्मक’ वार्तापछि दमास्कसमा आफ्नो मिसन पुनः खोल्ने ब्लकको विदेश नीति प्रमुखले मंगलबार बताएका छन् ।

“यो धेरै महत्त्वपूर्ण कदम हो, हामी सिरियामा प्रतिनिधिमण्डल पुनः खोल्नेछौँ,” ईयूका काजा कल्लासले युरोपेली संसद्लाई भने ।

सिरियाका लागि ईयूका शीर्ष कूटनीतिज्ञले सोमबार दमास्कसको भ्रमण गरेका थिए । यसलाई कालासले ‘नयाँ नेतृत्व र अन्य विभिन्न समूह, नागरिक समाजसँग पनि रचनात्मक पहिलो सम्पर्क’ भने ।

युरोपेली राष्ट्रहरू अन्य अन्तर्राष्ट्रिय खेलाडीहरूसँगै असद परिवारको पाँच दशक लामो प्रभुत्वको अन्त्यपछि सिरियामा प्रभावका लागि संघर्ष गरिरहेका छन् ।

तर, तिनीहरू इस्लामवादी समूह हयात ताहरिर अल–शाम (एचटीएस)को नेतृत्वमा नयाँ अधिकारीहरूबाट सावधान छन् । एचटीएस अल–कायदामा निहित थियो र केही पश्चिमी सरकारद्वारा ‘आतंकवादी’ संठनका रूपमा सूचीबद्ध गरिएको छ ।

“हामी सिरियामा खालीपन छोड्न सक्दैनौँ, ईयू यहाँ उपस्थित हुनुपर्छ,” कालासले भने ।

ईयूले सिरियाका लागि समर्थन बढाउन तयार रहेको तर नयाँ नेताहरूले सम्मान गर्नुपर्ने सर्तहरू राखेको छ । ती शर्तहरूमा अल्पसङ्ख्यकहरूको संरक्षण, समावेशी संक्रमणको निगरानी र उग्रवादको बहिष्कार समावेश छन् ।

कालासले सोमबार ईयूले सिरियाको भविष्यमा मस्कोको कुनै स्थान नभएको भन्दै देशमा रूसी सैन्य आधारहरूको उपस्थितिलाई लिएर अधिकार प्राप्त गर्नेहरूलाई पनि दबाब दिने बताए ।

रूसले गृहयुद्धका बेला आफ्ना सैनिकहरूद्वारा असदलाई समर्थन गर्यो र अब उनको निष्कासनपछि सुरक्षित आश्रय प्रदान गरेको छ । रासस/एएफपी