काठमाडौं । फ्रेन्चाइज फुटबल प्रतियोगिता नेपाल सुपर लिग (एनएसएल)को तेस्रो संस्करण आगामी चैत तेस्रो हप्तादेखि सुरु हुने भएको छ ।

बिहीबार आयोजक नेपाल स्पोर्टस एन्ड इभेन्ट्स म्यानेजमेन्ट (एनएसईएम) र अखिल नेपाल फुटबल संघ (एन्फा)बीच चैत १६ मा प्रतियोगिता सुरु गर्ने सम्झौता भएको जानकारी गराएको छ ।

एनएसईएमका प्रबन्ध निर्देशक श्रीयांश कार्कीले प्रतियोगिताको तेस्रो संस्करणको मिति घोषणा गर्न पाउँदा आफू निक्कै उत्साहित रहेको बताए ।

“नेपाली फुटबलमा लगाब राख्ने समर्थकका बीचमा एनएसएलको तेस्रो संस्करणको घोषणा गर्न पाउँदा हामी निक्कै उत्साहित छौँ,” कार्कीले भनेका छन्, “यो हाम्रा खेलाडी, क्लब र सबै सरोकारवालाहरुको फुटबल लगाबलाई सम्बोधन गर्ने साझा थलो हुनेछ । नेपाली फुटबललाई माथिल्लो स्तरमा उकास्नका लागि प्रतियोगिताले योगदान गर्नेमा हामी विश्वस्त छौँ ।”

यसैगरी एन्फाका महासचिव किरण राईले पनि नेपाली फुटबल क्यालेन्डरमा एनएसएलले विशेष स्थान पाएको बताए । चैत १२ गते नेपालले मलेसियासँग अन्तर्राष्ट्रिय फुटबल खेल्ने भएकाले एनएसएलका लागि यो उपयुक्त समय हुने उनले बताए ।