काठमाडौं । बेंगलुरुमा एक एआई इन्जिनियरले आत्महत्या गरेको घटना सार्वजनिक भएको छ । डिसेम्बर ९ मा ३४ वर्षीय अतुल सुभाषले एक घण्टा २० मिनेट लामो भिडियो र २४ पृष्ठको 'सुसाइड नोट' जारी गरेर आत्महत्या गरेको भारतीय सञ्चारमाध्यमले जनाएका छन् । अतुलले मृत्युका लागि श्रीमती निकिता सिंघानिया, सासु, सालो र काका ससुरालाई जिम्मेवार ठहर गरेका छन् ।

अतुलले उत्तर प्रदेशको जौनपुरका एक न्यायाधीशमाथि पनि गम्भीर आरोप लगाएका छन् । उनले आफ्नो सुसाइड नोटमा मुद्दा सुल्झाउने नाममा न्यायाधीशले पाँच लाख मागेको दाबी गरेका छन् । अतुलले आफ्नी श्रीमती र सासुले आत्महत्या गर्न भनेका पनि लेखेका छन् ।

अतुलको शव बेंगलुरुको मन्जुनाथ लेआउटमा रहेको उनको फ्ल्याटमा भेटिएको थियो । छिमेकीले घरको ढोका तोड्दा उनको शव झुन्डिएको अवस्थामा फेला परेको थियो । कोठामा ‘जस्टिस इज ड्यू’ लेखिएको प्लेकार्ड भेटिएको थियो । अतुलका परिवारको उजुरीका आधारमा प्रहरीले अतुलकी श्रीमती र श्रीमतीका परिवारविरुद्ध आत्महत्या दुरुत्साहन मुद्दा दर्ता गरेको छ ।

अतुलले एक्समा आफ्नो अन्तिम भिडियोको लिंक पोस्ट गरेका थिए । जहाँ उनले एलन मस्क र डोनाल्ड ट्रम्पलाई ट्याग गरेका छन् ।

अतुलले २४ पृष्ठको पत्रमा राष्ट्रपति द्रौपदी मुर्मुलाई पत्र पनि लेखेका छन् । यसमा उनले देशको फौजदारी न्याय प्रणालीका कमजोरीबारे लेखेका छन् । उनले पुरुषमाथि झुटा मुद्दा दायर गर्ने प्रवृत्तिको चर्चा गरेका छन् । अर्को नोटमा, उनले लेखेका आफ्नी श्रीमतीले दायर गरेका सबै मुद्दामा आफू निर्दोष रहेको जिकिर गरेका छन् ।

आत्महत्या गर्नुअघि रेकर्ड गरिएको भिडियोमा अतुलले पूरै घटनाको विस्तृत विवरण दिएका छन् । उनले म्याट्रिमोनी साइटमार्फत म्याच भेटेपछि २०१९ मा विवाह गरेको उल्लेख गरेका छन् । अर्को वर्ष छोरा भएको उल्लेख छ ।

आफ्नी श्रीमती र श्रीमतीको परिवारले जहिले पनि आफूसँग पैसा माग्ने गरेको उनले पूर्ति गर्ने गरेको उनको भनाइ छ । उनले श्रीमतीको परिवारलाई आफूले लाखौँ रुपैयाँ दिएको र थप पैसा दिन बन्द गरेपछि श्रीमतीले २०२१ मा छोराको साथ बेंगलुरु छोडेको बताएका छन् ।

अतुलले आफूले छोराको हेरचाहका लागि मासिक ४० हजार रुपैयाँ दिने गरेकोमा अहिले श्रीमतील‍े बच्चा हुर्काउन मासिक चार लाखसम्म माग गरिरहेको बताएका छन् । उनले श्रीमतीले छोरालाई भेट्न र बोल्न पनि नदिएको बताएका छन् ।

आफ्नो श्रीमतीले १० लाख रुपैयाँ दाइजो मागेको आरोप लगाएका कारण बुवाको हृदयघातका कारण मृत्यु भएको अतुलको भनाइ छ ।

मुद्दा सल्टाउन तीन करोड माग !

अतुलका अनुसार, आफूविरुद्धको मुद्दा मिलाउन श्रीमतीले सुरुमा एक करोड रुपैयाँ मागेकी थिइन् । तर, पछि बढाएर तीन करोड मागिएको उनको दाबी छ । आफूले तीन करोडको मागबारे जौनपुरको पारिवारिक अदालतका न्यायाधीशलाई बताएको तर न्यायाधीशले पनि श्रीमतीलाई नै साथ दिएको उनको भनाइ छ ।

अतुलले आफूले न्यायाधीशसमक्ष देशमा धेरै पुरुषले झुटा मुद्दाका कारण आत्महत्या गरिरहेको तथ्य प्रस्तुत गरेको बताएका छन् । तर, श्रीमतीले 'तिमीले पनि किन आत्महत्या नगर्ने ?' भनेर बताएको उनले बताएका छन् । यो सुनेर न्यायाधीश हाँसेको उनको भनाइ छ ।

इन्डिया टुडेबाट ।