काठमाडौं । प्रधानसेनापति अशोकराज सिग्देल भारतको औपचारिक निमन्त्रणामा आज (मंगलबार) मित्रराष्ट्र भारतको नयाँदिल्ली प्रस्थान गरेका छन् । भारतका स्थल सेनाध्यक्ष उपेन्द्र द्विवेदीको निमन्त्रणाका उनी भारत गएका हुन् ।  

उनले मंसिर २६ गतेदेखि मंसिर २९ गते सम्म भारतको औपचारिक भ्रमण गर्ने कार्यक्रम रहेको छ । उनको भ्रमण दलमा नौजना छन् । भारत प्रस्थान गरेका प्रधानसेनापतिलाई बलाध्यक्ष रथी प्रदीपजंग केसीले त्रिभुवन अन्तर्राष्ट्रिय विमानस्थलमा बिदाई गरे । 

प्रधानसेनापतिमा नियुक्त भएपश्चात् उनको यो पहिलो विदेश भ्रमण हो । भ्रमणका दौरान प्रधानसेनापति सिग्देललाई मंसिर २७ गते भारतका राष्ट्रपतिबाट भारतीय स्थलसेनाको मानार्थ महारथी दर्जाको दर्ज्यानी चिह्नबाट सुशोभन गर्नेछन् । 

प्रधानसेनापति सिग्देलको अनुपस्थितिमा बलाध्यक्ष रथी प्रदीप जंग केसीले कायममुकायम प्रधानसेनापतिको कार्यभार सम्हाल्नेछन् । प्रधानसेनापतिसहितको भ्रमण दल मंसिर ३० गते स्वदेश फिर्ता हुनेछ ।