काठमाडौं । कतारको दोहास्थित सिरियाली दूतावासले देश स्वतन्त्र भएको जनाउँदै खुसीयाली मनाएको छ । 

दोहास्थित सिरियाली दूतावासले एक विज्ञप्ति जारी गर्दै भनेको छ, “स्वतन्त्रताको बिहानी उदय भएको छ र सिरिया तानाशाहबाट मुक्त भएको छ ।” 

विद्रोही समूह हयात तहरीर अल–शाम (एचटीएएस)ले आइतबार बिहान राजधानी दमास्कस कब्जा गरेको दाबी गर्दै सिरिया स्वतन्त्र भएको घोषणा गरेपछि दूतावासले स्वतन्त्रताको खुसीयाली मनाएको हो । 

“मानव मर्यादा र राष्ट्रको स्रोतलाई खलल पुर्‍याउने गम्भीर अपराधका दोषीहरूलाई बुझाउन अस्वीकार गर्दै हाम्रा जनताले दशकौँसम्म अकथनीय अन्याय सहेका छन्,” दूतावासले भनेको छ ।

जनताले अब सबै सिरियालीहरूको मातृभूमि हुनेगरी देशको पुनर्निर्माण गर्ने विज्ञप्तिमा उल्लेख छ । 

“हामी यो सन्देश हाम्रा सबै मानिसहरूलाई दिन चाहन्छौँ– हाम्रो अगाडिको बाटो लामो र चुनौतीपूर्ण छ । हामीले आफ्नो देशको पुनर्निर्माण गर्न एक अर्कासँग हातेमालो गर्नुपर्नेछ,” विज्ञप्तिमा भनिएको छ । 

एचटीएएस राजधानी दमास्कस प्रवेश गरेको केहीक्षणमा नै सिरियाका राष्ट्रपति बसर अल–असदले देश छोडेर भागेको दाबी विद्रोही समूहले गरेको छ । तर असद कहाँ गए भन्ने कसैले भन्न सकेको छैन ।