काठमाडौं । संसारकै सबैभन्दा बुढो (पोथी) चराले नयाँ प्रेमी भेटेको छ । अल्बाट्रोस प्रजातिको ७४ वर्षको चराले नयाँ प्रेमी फेला पारेको वैज्ञानिकले बताएका छन् । उक्त चरालाई वैज्ञानिकहरूले ‘द विस्डम’नाम दिएका छन् । चार वर्षमा एकचोटि अन्डा पार्ने उक्त चराले भर्खरै मात्र अन्डा पारेको उनीहरूले बताएका छन् ।

संयुक्त राज्य अमेरिकाको मिडवे नेसनल वाइल्डलाइफ रिफ्युजमा उक्त चराले हालसालै अन्डा पारेको हो । ‘यूएस फिस एन्ड वाइल्डलाइफ सर्भिस, प्यासिफिक’ले आफ्नो एक्स अकाउन्टमा उक्त चराले नयाँ प्रेमी बनाएको र अन्डा पारेको खुसी मनाएको छ ।

विख्यात पन्छीविद् च्यान्डलर रोबिन्सनले सन् १९५६ मा विस्डमको खुट्टामा पहिचानका लागि एउटा रातो फित्ता बाँधिदिएका थिए । फित्ता बाँध्ने समयमा उक्त चरा पाँच वर्षको मात्रै थियो ।

विस्डमले यस अगाडि सन् २०२१ मा अन्डा पारेको थियो । विस्डमसँग त्यतिखेर देखिएको प्रेमी भने यसपटक देखिएको छैन । यी चराहरूले सामान्यतया एउटै जीवनसाथी बनाउने गर्छन् । तर, ७४ वर्षे विस्डमले भने तीनवटा प्रेमी फेरिसकेको वैज्ञानिकहरूको अनुमान छ । वैज्ञानिकहरूले विस्डमको नयाँ प्रेमीलाई पनि पहिचानका लागि ट्याग लगाएका छन् । सन् २०२१ मा विस्डमसँग देखिएको प्रेमी चरा त्यसयता देखिएको छैन ।

वैज्ञानिकहरूका अनुसार, विस्डमले अहिलेसम्म ६० वटा अन्डा पारेको छ । जसमध्ये ३० वटाबाट बच्चा हुर्किएका छन् । अक्टोबरदेखि नोभेम्बर महिनाको बीचमा उनीहरू गर्भधारण गर्छन् । अल्बाट्रोस चराहरू ओथारो बस्न र बचेरा हुर्काउन मिडवे नेसनल वाइल्डलाइफ रिफ्युजमा आउने गर्छन् ।

यी चराहरूले वर्षको आधाभन्दा बढी समय बचेरा हुर्काउनमा खर्च गर्छन् । बचेरालाई चारो खोज्न यी चराहरू हजारौँ किलोमिटर टाढासम्म पुग्छन् । समूहमा बस्ने अल्बाट्रोसका भाले र पोथी पालैपालो ओथारो बस्छन् र बचेराका लागि आहारा खोज्ने गर्छन् ।

खतराको सूचीमा रहेको अल्बाट्रोस चरा सामान्यतया १२ देखि ४० वर्षसम्म बाँच्ने गर्छ । तर, विस्डम ७४ वर्ष बाँचेको देखेर वैज्ञानिकहरू नै चकित परेका छन् ।

विस्डम सबैभन्दा बुढो जंगली चरा हो । 

कुकी नाम गरेको घरपालुवा सुगा ८२ वर्ष ८९ दिन बाँचेको थियो । यो सुगाको सन् २०१६ मा मृत्यु भइसकेको छ ।

सीएनएनबाट ।