काठमाडौं । जेलमा रहेका पाकिस्तानका पूर्वप्रधानमन्त्री इमरान खानविरुद्ध थप १४ नयाँ मुद्दा दर्ता गरिएको छ । योसँगै इस्लामाबादमा इमरानविरुद्ध दर्ता भएका मुद्दाको संख्या ७६ पुगेको छ ।

इस्लामावाद क्यापिटल टेरिटरी पुलिस (आईसीटीपी)ले आज उच्च अदालतमा प्रतिवेदन बुझाएर यसबारे जानकारी दिएको हो ।

रिपोर्टका अनुसार, गत महिना नोभेम्बर २४ मा इस्लामाबादको डी–चोकमा भएको प्रदर्शनपछि इमरानविरुद्ध १४ नयाँ मुद्दा दर्ता गरिएको हो । यसअघि उनीविरुद्ध ६२ मुद्दा दर्ता भएका थिए, जुन अहिले बढेर ७६ पुगेको छ ।

इमरानले जेलबाट सन्देश जारी गर्दै आफ्ना समर्थक र पीटीआई पार्टीका कार्यकर्ताहरूलाई देशभर विरोध प्रदर्शन गर्न आग्रह गरेका थिए । चुनावमा आफ्नो पार्टीलाई दिएको जनादेशलाई मान्यता दिनुपर्ने, थुनामा रहेका पार्टीका सदस्यहरूलाई रिहा गर्नुपर्ने र सर्वोच्च अदालतमा न्यायाधीश नियुक्तिसम्बन्धी २६औँ संशोधन खारेज गर्नुपर्ने इमरान पक्षको माग थियो ।

प्रदर्शनकारीलाई रोक्न पाकिस्तानको श्रीनगर राजमार्गमा कन्टेनर राखिएको थियो । तर, प्रदर्शनकारीहरू कन्टेनरमा चढेर बाटो काटेका थिए । प्रदर्शनकारीहरू २४ नोभेम्बरमा इस्लामाबादको उच्च सुरक्षा क्षेत्र (रेड जोन) डी–चोक पुगेका थिए ।

आन्दोलनकारीले यहाँ आन्दोलन सुरु गरेका थिए । तर, २६ नोभेम्बर राति प्रहरीले प्रदर्शनकारीलाई जबरजस्ती डी–चोकबाट हटाएको थियो ।

डी–चोक इस्लामाबादको संवेदनशीन क्षेत्र हो । यस क्षेत्रमा राष्ट्रपति भवन, प्रधानमन्त्री कार्यालय, संसद् भवन र सर्वोच्च अदालत छन् ।

प्रदर्शनका क्रममा सात जनाको मृत्यु पनि भएको थियो । जसमा चार आन्दोलनकारी र तीन प्रहरी छन् । पाकिस्तानी सञ्चारमाध्यममा इमरानका समर्थकले प्रहरीलाई कुटपिट गरी हत्या गरेको दाबी गरिएको थियो ।

प्रदर्शनकारीलाई रोक्न प्रहरीले अश्रुग्यास प्रहार गरेको थियो । जवाफमा प्रदर्शनकारीले प्रहरी र सेनामाथि ढुंगा हानेका थिए ।

एजेन्सीको सहयोगमा ।