काठमाडौं । नेपाल प्रिमियर लिग (एनपीएल) सुरु हुनुअघि नेपाल क्रिकेट संघ (क्यान) को स्पष्ट प्रतिक्रिया थियो– ‘यसपटक समर्थकको व्यवस्थापनलाई लिएर हामी सजक छौँ । पहिलेभन्दा राम्रो र चुस्त हुन्छ ।’

तर, शनिबारबाट सुरु भएको एनपीएलको पहिलो खेलमै समर्थक व्यवस्थापनमा क्यान नराम्रोसँग बजारियो । प्रतियोगिताको उद्घाटन खेल हप्तादिन अघि टिकट काटेका दर्शकले शनिबार मैदानमा प्रवेश पाएनन् ।

टिकट भएर पनि प्रवेश गर्न नपाएका दर्शकले गेटमा खैलाबैला मच्चाउँदा क्यानका सचिव पारस खड्का नै उनीहरूलाई सान्त बनाउन पुग्नुपरेको थियो । सचिव खड्का र टिकट पाएर पनि खेल हेर्न नपाएका आक्रोशित समर्थकपछिको चर्चाचर्कीको भिडियो अहिले सामाजिक सञ्जालमा चर्चाको विषय बनेको छ ।

प्रतियोगिताको पहिलो खेल विराटनगर किंग्स र जनकपुर बोल्ट्सबीच प्रतिस्पर्धा थियो । टिकट र भिड व्यवस्थापनमा क्यान नराम्रोसँग चुक्दा समर्थक पटकपटक पर्खाल नाघेर मैदान प्रवेश गरिरहेका थिए । प्रतियोगिताअघि क्यानको तर्क थियो– ‘यसपटक गेट भाचिँदैन ।’

तर, शनिबारको खेलको पहिलो इनिङमै मैदान बाहिरका दर्शकले गेट भत्काए । यो भिड नियन्त्रण गर्न प्रहरीले लाठीसमेत चलाएको थियो । यही हुलदंगामा सातजना घाइते भए । यसमध्ये दुईको अवस्था केही चिन्ताजनक थियो । तर, आज यी दुवै खतरामुक्त भइसकेको काठमाडौं प्रहरी परिसरका प्रवक्ता नवराज अधिकारीले बाह्रखरीलाई बताए ।

गल्ती कसको ?

क्यानका अनुसार, उद्घाटन खेलका निम्ति सामान्यतर्फ १० हजारमात्रै टिकट काटिएको थियो । शनिबार मैदानभित्र पुगेका समर्थकको उपस्थिति हेर्दा अनुमान गर्दा पनि १० हजारमात्र थिएनन् भन्ने प्रस्ट थियो ।

खेलका लागि समर्थकले पे वालेट 'खल्ती'मार्फत अनलाइन टिकट काटेका थिए । तर, समर्थकले मैदानभित्र प्रवेश पाउन कीर्तिपुर परिसरबाहिर रहेको खल्तीको स्टलबाट मोबाइलमा क्यूआर देखाएर भौतिक टिकट लिनुपर्ने थियो । यसले पनि भिड बढाउन सहयोग गर्‍यो । 

खेल हेर्न मैदानभित्रको दर्शकदीर्घामा बस्ने स्थानमा पुगेका जति थिए, बाहिर पनि त्यतिकै संख्यामा समर्थकको उपस्थिति थियो । क्यानका प्रवक्ता छुम्बी लामाले टिकट नभएका दर्शकको उपस्थिति बढी हुँदा शनिबार कीर्तिपुर परिसरमा केही समस्या भएको बताए ।

“हामीले एक हप्ताअघि टिकटको नोटिस निकालेका थियौँ । त्यसको केही दिनपछि नै हामीले टिकट सोल्ड आउट भइसकेको भनेर पनि विज्ञप्ति निकाल्यौँ । दुई दिनअघि पनि हामीले समर्थकहरूलाई टिकट समाप्त भइसकेको हुँदा घरमै बसेर हेर्न अनुरोध गरेका थियौँ,” प्रवक्ता लामाले बाह्रखरीसँग भने, “तर, पनि शनिबार कीर्तिपुरमा थामिनसक्नु समर्थक आउनुभयो । भिड धेरै हुँदा केही सामान्य घटना पनि भयो । हो, टिकट भएर पनि भित्र जान नपाउनु भएका मान्छेहरू हुनुहुन्थ्यो । उहाँहरूको टिकट रिफन्ड हुन्छ । हामी त्यसका लागि खल्तीसँग छलफल गरिरहेका छौँ ।”

उनले टिकट भएका समर्थक खेल सुरु भइसकेपछि मैदान परिसर पुग्दा भिडका कारण उनीहरू मैदानभित्र जान नपाएको बताए । उनले मैदान बाहिर देखिएको घटनामा क्यानको गल्ती नरहेको पनि जिकिर गरे ।

“खेल सुरु हुने समय १२ः१५ बजे थियो । तर, समर्थकहरू दिउँसो २ बजे मैदान पुगेका थिए । गेटमा एक जनासँग टिकट हुँदा बाँकी २० जनाको भिड टिकट बेगर थिए । बाहिर बसिरहेका १० हजारको संख्यामा उपस्थित दर्शकका कारण टिकट भएकाहरू पनि भित्र छिर्न पाएनन्,” उनले भने, “हामीले टिकट नभए मैदानमा नआउन बारम्बार आग्रह गरेका थियौँ । तर, पनि कीर्तिपुरमा धेरै समर्थक आउनुभयो । त्यसमा क्यानको कुनै गल्ती छैन । हिजोको घटनालाई ध्यानमा राख्दै आगामी दिनमा त्यस्तो हुन नदिन क्यान काम गरिरहेको छ ।”

घाइतेमध्ये दुईजना प्रहरी थिए । काठमाडौं प्रहरी परिसरका प्रवक्ता अधिकारीले पनि त्रिविमा शनिबार देखिएको कोलाहलपूर्ण स्थितिको कारण मैदान बाहिर उपस्थित दर्शकलाई देखाए । 

“मैदान वरपरको भिडले शनिबार केही असहज परिस्थिति बन्यो । त्यसमा सातजना घाइते भएका थिए । जसमध्ये पाँचजना डिस्चार्ज भइसकेका छन् । हिजो गम्भीर अवस्थामा रहेको भनिएका पनि अहिले खतरामुक्त छन्,” प्रवक्ता अधिकारीले भने ।

तस्बिरहरू : हरिशजंग क्षेत्री/बाह्रखरी