काठमाडौं । सुनीलकुमार झाको पुस्तक ‘देशको पीडा विदेशको पीर’ सार्वजनिक गरिएको छ । काठमाडौंमा आयोजित एक कार्यक्रममा स्वामी डा. केशवानन्द गिरीलगायत व्यक्तिहरूले उक्त पुस्तकको लोकार्पण गरे ।

कार्यक्रममा डीएल भण्डारीको ‘दी अनसिन पोएट अफ सिमरा–कवि सदानन्द झा’ पनि सार्वजनिक गरियो । स्वामी केशवानन्दले आफूलाई लेखक र किताबको शक्तिले तानेर कार्यक्रममा ल्याएको बताए । यो पुस्तकले धेरै कुरा आउँदो पुस्तामा हस्तान्तरण गरेको उनले उल्लेख गरे ।

पुस्तकको समीक्षा गर्दै कृष्णमुरारि भण्डारीले मधेस, पहाड र हिमाललाई बुझ्न यो किताब पढ्न आवश्यक रहेको जिकिर गरे ।

अग्रज साहित्यकार डा. राजेन्द्र विमलले किताब पढ्दा एकैपटक धेरै विद्वान् र सन्तहरूको सम्झना भएको बताए । उनले यो कृति पढ्दा कवि सदानन्दप्रति आफ्नो हृदय झुकेको उल्लेख गरे ।

पुस्तकको सम्पादक दिनेश पौडेलले सम्पादनका क्रममा गरेका कामका बारेमा जानकारी गराए । किताब एक संघर्षको कथा रहेको उनले बताए ।

पुस्तकका लेखक झाले आफूले सानै उमेरदेखि बडाबा सदानन्द झाबाट ज्ञानगुनका कुरा सुन्ने गरेको स्मरण गरे ।

कार्यक्रममा पुस्तक विमोचनअघि दाजुभाइ सुनीलकुमार र विजय झाका तर्फबाट शिक्षकहरूलाई सम्मान गरिएको थियो ।