काठमाडौं । परराष्ट्रमन्त्री डा. आरजु राणा देउवाले चिनियाँ परियोजना, बेल्ट एण्ड रोड इनिसिएटिभ (बीआरआई)को कार्यान्वयन योजना दुवै देशको सहमतिमै अघि बढ्ने बताएकी छन् ।  

चिनियाँ विदेशमन्त्री वाङ यीको मैत्रीपूर्ण निमन्त्रणामा भएको चीनको औपचारिक भ्रमण सकेर आज स्वदेश फर्किएलगत्तै त्रिभुवन अन्तर्राष्ट्रिय विमानस्थलमा आयोजित प्रेस मिटमा उनले बीआरआईको कार्यान्वयन सहमतिमा हुने बताएकी हुन् ।  

“बीआरआई परियोजनाको फ्रेमवर्कमा नेपालले सन् २०१७ मा नै हस्ताक्षर गरिसकेको छ । अहिले यसको कार्यान्वयनको योजनाबारे कुराकानी भइरहेको छ,” उनले भनिन्, “यो नेपाल र चीनबीचको सहमति तथा समझदारीका साथै नेपालमा पनि सबैको साझा सहमतिकै आधारमा हुनेछ ।” 

मन्त्री राणाले अहिले नेपाल ऋण लिनसक्ने अवस्थामा नरहेकाले चीन सरकारसँग पनि यसै विषयमा कुराकानी भएको स्पष्ट पारिन् । 

“यो परियोजना अनुदानमा गर्ने भन्ने विषय नेपाली कांग्रेसले औपचारिक निर्णय नै गरिसकेको छ ।  यो जानकारी वर्तमान सत्ता साझेदार दल नेकपा एमालेलाई पनि छ,” उनले भनिन्, “त्यसैले अनुदानमा नै यो परियोजनालाई अघि बढाउने विषयमा हामीले छलफल गरिरहेका छौँ ।”