बेरुत । राजधानीको मुटुमा गरिएको इजरायली हवाई आक्रमणबाट शनिबार कम्तीमा ११ जनाको मृत्यु भएको लेबनानले जनाएको छ । इजरायली सेनाले क्षेत्र खाली गर्न आह्वान गरेपछि बेरुतमा आक्रमण गरिएको थियो ।

इजरायलले भने हालसम्म बेरुतमा गरिएको उक्त आक्रमणबारे कुनै टिप्पणी गरेको छैन । शनिबार बिहान यस क्षेत्रमा उद्धार कार्य चलिरहेको थियो । उद्धारकर्ता भग्नावशेष हटाई नागरिक सुरक्षामा तैनाथ थिए ।

घटनाको पुष्टि गर्दै लेबनानी स्वास्थ्य मन्त्रालयले ६३ जना घाइते भएका जनाएको छ । डीएनए परीक्षणपछि मृत्युको अन्तिम संख्या निर्धारण हुने मन्त्रालयले विज्ञप्तिमा उल्लेख गरेको छ ।

लेबनानी राष्ट्रिय समाचार एजेन्सीले इजरायली जेट विमानहरूले संरचनामा ६ क्षेप्यास्त्र प्रहार गरेका र नजिकैका भवनहरूमा व्यापक विनाश गरेको जनाएको छ ।

इजरायली सेनाले धेरै हिजबुल्लाह कमान्ड सेन्टरसहित सहरको दक्षिणी उपनगरहरूमा आक्रमण गरिएको जनाएको छ ।

इजरायलले सेप्टेम्बरको अन्त्यमा इरान समर्थित समूहविरुद्ध आफ्नो अभियानलाई अगाडि बढाएको थियो । रासस/एएफपी