काठमाडौं । ८३ वर्षको उमेरमा आइतबार निधन भएका पूर्वसभामुख दमननाथ ढुंगानाको अन्त्येष्टि सोमबार (भोलि) गरिने भएको छ । काठमाडौंको बानेश्वरस्थित फ्रन्टलाइन अस्पतालमा उपचारका क्रममा उनको निधन भएको हो ।

वरिष्ठ अधिवक्ता समेत रहेका ढुंगाना कलेजोसँग सम्बन्धित समस्याका कारण केही समयदेखि उपचाररत थिए । उनका श्रीमती, दुई छोरा र एक छोरी छन् । ढुंगानाको सोमबार अन्त्येष्टि गरिने पारिवारिक स्रोतले जनाएको छ ।

ढुंगानाको निधनको खबर पाएपछि प्रधानन्यायाधीश प्रकाशमान सिंह राउत, प्रतिनिधिसभाका उपसभामुख इन्दिरा राना, नेपाल बार एसोसिएसनका अध्यक्ष गोपालकृष्ण घिमिरेलगायत अधिकारी फ्रन्टलाइन अस्पताल पुगेका थिए ।

त्यसक्रममा उपसभामुख रानाले आफूले ढुंगानालाई अभिभावकका रूपमा लिएको र उनको निधनप्रति निकै दुःख लागेको बताइन् ।

यस्तै, बार अध्यक्ष घिमिरेले ढुंगानाले नेपालको संसदीय प्रणालीमा खेलेको भूमिका निकै स्मरणीय रहेको बताए । ढुंगाना निष्ठामा बाँच्ने आदर्श व्यक्तित्व भएको उनले उल्लेख गरे ।

ढुंगाना ०४८ सालमा नेपाली कांग्रेसका तर्फबाट उमेदवार बन्दै काठमाडौं क्षेत्र नम्बर–२ बाट प्रतिनिधिसभामा निर्वाचित भएका थिए । उनी ०४८ देखि ०५१ सम्म सभामुख बनेका थिए । उनले नेपालको प्रजातान्त्रिक आन्दोलनमा महत्त्वपूर्ण योगदान दिएका छन् । हिमालयन टेली भ्वाइस