काठमाडौं । दैलेखको महाबु गाउँपालिका अध्यक्षको उपनिर्वाचनको पूर्वसन्ध्यामा नेकपा (एकीकृत समाजवादी)का केन्द्रीय सदस्य नेकपा (एमाले) प्रवेश गरेका छन् । 

एकीकृत समाजवादीका केन्द्रीय सदस्य जंगबहादुर शाही मंगलबार (आज) एमाले प्रवेश गरेका हुन् । एमालेको स्थायी कमिटी सदस्य यामलाल कँडेलले पार्टीमा स्वागत गरे । ०७४ को निर्वाचनमा एमालेबाट गाउँपालिका अध्यक्ष जितेका शाहीलाई एमालेले पार्टीमा भित्र्याएको हो । एकीकृत समाजवादीबाट उमेदवार बनेका शाही २०७९ को निर्वाचनमा भने पराजित भएका थिए । 

उनलाई नै एमालेले उपनिर्वाचनको उमेदवार बनाउने तयारी गरेको चर्चा चलेको छ । एमालेका दैलेख जिल्ला अध्यक्ष सूर्यबहादुर शाहीले उनलाई नै उमेदवार बनाउने भन्ने निष्कर्षमा पुगिनसकेको बताए । उमेदवारबारे केही दिनमा नै निर्णय गर्ने उनको भनाइ छ । “यसअघि अध्यक्षको आकांक्षीका रूपमा सातजनाको नाम आएको छ । हिजोसम्म एकीकृत समाजवादीमा रहनुभएको उहाँ (शाही) पनि आजबाट थपिनुभएको छ । उमेदवारबारे पर्सीसम्ममा निर्णय गर्छौँ” उनले बाह्रखरीसँग भने । 

०७९ को निर्वाचनबाट पालिका अध्यक्ष चुनिएका लछुमन गुरुङको निधन भएपछि रिक्त पदमा मंसिर १६ गते उपनिर्वाचन हुँदैछ । गुरुङ कांग्रेसबाट निर्वाचित भएका थिए ।