बाकु अजरबैजान । अजरबैजानको राजधानी बाकुमा जलवायु परिवर्तनसम्बन्धी संयुक्त राष्ट्र फ्रेमवर्क कन्भेन्सन (कोप–२९) सम्मेलन सोमबारदेखि सुरु भएको छ । विश्वभरका नेताहरू छलफल र विश्वव्यापी सहकार्यका निम्ति नोभेम्बर २२ सम्म बाकुमा भेला भई जलवायु संकटको सामनामा केन्द्रित रहने जनाइएको छ ।

देशहरूले उत्सर्जनमा कटौती र विश्वव्यापी आपूर्ति शृंखलामा थप उदारलगायत व्यवस्था गर्न नसकेसम्म कुनै पनि अर्थव्यवस्था जी–२० सहित–अनियन्त्रित विश्वव्यापी उष्णताबाट बाँच्न नसकिने तथा गम्भीर मुद्रास्फीति प्रभावबाट उम्कन नसक्ने संयुक्त राष्ट्रसंघले जनाएको छ ।

राष्ट्रसंघका अनुसार, सम्मेलनले पछिल्लो समय विश्वव्यापी तापक्रम उच्च हुँदा बढ्दै गएका प्रतिकूल मौसमी घटनाले कोप–२९ सम्बन्धित सबैलाई विश्वव्यापी मुद्दाको समाधानका निम्ति एकताबद्ध बनाउनेछ ।

जलवायु परिवर्तनकोे प्रभावबाट जीवनरक्षा गर्न खर्बौँ डलर आवश्यक  रहेकाले कोप–२९ को मुख्य ध्यानाकर्षण आर्थिक मामलामा हुने तथा देशहरूलाई हरितगृह ग्यास उत्सर्जन घटाउन आह्वान गर्न रहने जनाइएको छ ।

यो वर्षको सम्मेलन नयाँ वित्तीय प्रतिबद्धतामा केन्द्रित छ, जसलाई ‘न्यु कलेक्टिभ क्वान्टिफाइड गोल (एनसीक्युजी)’ नाम दिइएको छ ।

एनसीक्युजी वा ‘फाइनान्स कोप’ भनेर चिनिने नयाँ लक्ष्य यो सम्मेलनमा छलफल गरिने र सन् २०२५ देखि प्रभावकारी हुने लक्ष्य राखिएको छ ।

जलवायु वित्तसम्बन्धी स्वतन्त्र उच्चस्तरीय विशेषज्ञ समूहको सन् २०२२ को प्रतिवेदनानुसार विकासशील देशहरूलाई जलवायु वित्त आवश्यकता पूरा गर्न सन् २०२५ सम्ममा प्रतिवर्ष १० खर्ब अमेरिकी डलर चाहिन्छ । सन् २०३० सम्ममा २४ खर्ब अमेरिकी डलर चाहिन्छ ।

कोप–२९ को मुख्य उद्देश्य जलवायुसम्बन्धी चुनौतीको सामना गर्ने कमजोर देशहरूलाई सहयोग गर्न वित्तीय लक्ष्यमा सम्झौता सुरक्षित गर्नु हो । रासस/एएनआई