काठमाडौं । दार्जिलिङको पर्यटकीय सहरका रूपमा परिचित मिरिकमा कवि तथा गीतकार दिनेश अधिकारीको एकल कविता वाचन सम्पन्न भएको छ । 

मिरिकस्थित ‘साहित्य सुनौँ परिवार’को आयोजना र दार्जिलिङ जर्नल पब्लिकेशनको सहयोगमा सम्पन्न उक्त एकल वाचन कार्यक्रममा कवि अधिकारीले २०३६ देखि २०८१ सालबीचमा लेखेका आफ्ना करिब दुई दर्जन चर्चित कविता तथा गीतहरू वाचन गरे । 

सशुल्क निमन्त्रणा गरिएको उक्त कार्यक्रममा अधिकारीले काव्य लेखनका सम्बन्धमा आफ्ना मान्यता र वाचन गरिएका सिर्जनासँग जोडिएका प्रसंगहरू सुनाएका थिए ।

परिवारका अध्यक्ष एवम् समालोचक राजबहादुर राईले समाज र जीवनका विविध पक्षमा लेखिएका अधिकारीका कविता र गीत समान रूपमा उत्कृष्ट रहेको विचार व्यक्त गर्दै विभिन्न भाषामा अनुवाद हुनुपर्नेमा जोड दिए । 

कार्यक्रममा संस्थाकी सचिव शीला लामाले अधिकारीको एकल कविता वाचन यस क्षेत्रका लागि अविस्मरणीय रहेको बताइन् ।