काठमाडौं । राष्ट्रिय फोटोपत्रकार समूह नेपाल (एनएफपीजे)को अध्यक्षमा पुनः प्रदीपराज वन्त निर्विरोध चयन भएका छन् । शनिबार आयोजित समूहको २७औँ साधारणसभा तथा १३औँ अधिवेशनबाट राष्ट्रिय समाचार समिति (रासस)का फोटोपत्रकार वन्तको अध्यक्षतामा १५ सदस्यीय नयाँ कार्यसमिति चयन गरिएको हो ।

समूहको वरिष्ठ उपाध्यक्षमा लेखबहादुर श्रेष्ठ (सागर), महिला उपाध्यक्षमा चन्द्रकला क्षेत्री, प्रथम उपाध्यक्षमा सुनील शर्मा, उपाध्यक्षमा नारायण सिलवाल, महासचिवमा घनश्याम श्रेष्ठ, सचिवमा प्रविन कुलुङ राई र कोषाध्यक्षमा प्रदीप श्रेष्ठ चयन भएका छन् । 

केन्द्रीय सदस्यमा सुशीलकुमार श्रेष्ठ, मुकुन्द कालीकोटे, रमिता छुँजु, हरिशसिंह नगाल, दीपेन्द्र महर्जन, अनुप प्रधान र सागर बस्नेत चयन भएका छन् ।

कार्यक्रममा ‘हरिगोपाल प्रधान फोटो पत्रकारिता सम्मान’ फोटोपत्रकार गणेश बिष्टलाई, ‘साहसिक फोटो पत्रकारिता सम्मान’ सुजन बज्राचार्यलाई, ‘पर्या–पर्यटन फोटो पत्रकारिता सम्मान’ प्रविन श्रेष्ठलाई, ‘मनोरञ्जन फोटो पत्रकारिता सम्मान’ लेखबहादुर श्रेष्ठलाई र ‘खेलकुद फोटो पत्रकारिता सम्मान’ सरोज नेपाललाई प्रदान गरिएको थियो ।

यस्तै, ‘माधव थापा जोखिमपूर्ण फोटो पत्रकारिता पुरस्कार २०८१’ सिविन नेपालकी फोटोपत्रकार रमिता छुँजुलाई, ‘संस्थागत एनएफपीजे प्रेसिडेन्ट अवार्ड २०८१’ कार्यवाहक महासचिव घनश्याम श्रेष्ठलाई र ‘उत्कृष्ट जिल्ला शाखा पुरस्कार’ रामेछाप शाखालाई प्रदान गरिएको थियो ।