ललितपुर । नेपाली कांग्रेसका केन्द्रीय सदस्य एवं राष्ट्रिय योजना आयोगका पूर्वउपाध्यक्ष डा. गोविन्दप्रसाद पोखरेलले राजनीतिक पार्टीका दर्शन र विचार मात्र नभई नेतृत्व पनि सही हुनुपर्नेमा जोड दिएका छन् ।

कांग्रेसका संस्थापक नेता सुवर्णशमशेरको स्मृति दिवस र सर्वमान्य नेता गणेशमान सिंहको जन्मजयन्तीका अवसरमा शनिबार ललितपुरमा आयोजित विचार गोष्ठीमा उनले नेतृत्व सही भए मात्र देशको विकास हुन सक्ने बताए । सही र सिर्जनशील नेतृत्वमा ध्यान दिनुपर्ने उनले उल्लेख गरे ।

“बीपी र गणेशमानलाई पढ्दा राजनीति गर्न मन लाग्छ, तर जनप्रतिनिधि हुन मन लाग्दैन । उहाँहरूमा त्यागको भावनाबाट राजनीतिक प्रणाली परिवर्तन गर्न सक्ने ताकत थियो, नेतृत्वमा रहेका एकार्कामा विश्वास थियो । सुवर्णशमशेरले तयार गरिदिएको अर्थतन्त्रकै आधारमा रहेर अहिले देश अगाडि बढिरहेको छ । आधार भए मात्रै सेवा प्रवाह गर्न सकिन्छ, राजनीति भनेको देश बनाउन हो,” उनले भने ।

उनले सुवर्णशमशेरले वि.सं. २०१६ मा बजेट ल्याउँदा रोपवे, सडक र पूर्वपश्चिमको सडकको खाका तयार गरेको स्मरण गरे ।

कांग्रेसका ललितपुर जिल्ला सभापति जीतेन्द्रकुमार श्रेष्ठले गणेशमानले निरंकुशता हटाउँदै प्रजातान्त्रिक आन्दोलन सफल पार्न बडाहाकिम समेत रहेका आफ्ना पिताको आलिसान महल छाडेर डेरामा बसेको स्मरण गरे । रासस