काठमाडौं । ललितपुरका एक व्यवसायीलाई ‘हनी ट्रयाप’मा पारी ३० लाख रुपैयाँ असुल गर्ने गिरोहमाथिको बृहत्तर अनुसन्धानको जिम्मा नेपाल प्रहरीको केन्द्रीय अनुसन्धान ब्युरो (सीआईबी)लाई दिइएको छ । प्रहरी प्रधान कार्यालयको निर्देशनानुसार, हनी ट्रयापको अनुसन्धान गरिरहेको जिल्ला प्रहरी परिसर ललितपुरको टोलीले बुधबार उक्त प्रतिवेदन सीआईबीलाई बुझाएको हो ।

हनी ट्रयापको घटना अनुसन्धान गर्न एक टोली बनाइएको र काम थालिसकेको सीआईबीका एसपी होबिन्द्र बोगटीले जानकारी दिए ।

गएको असोज ६ गते सुनसरीको इटहरीका ताज स्लाम र दर्शन पोखरेलले युवतीको प्रयोग गरी एक व्यवसायीबाट ३० लाख रुपैयाँ असुल गर्ने योजना बनाएका थिए । योजना अनुसार, उनीहरू युवतीसहित इटहरीबाट ललितपुरको भैँसेपाटी आएका थिए ।

ती व्यवसायीबाट रकम असुल गर्न उनीहरूले प्रहरी प्रभाग भैँसेपाटीकी तत्कालीन प्रमुख एवं इन्स्पेक्टर विनुकुमारी शाहीलाई समेत प्रभावमा पारेका थिए । ललितपुर प्रहरीले उक्त सूचना पाएपछि असोज ९ गते ताज र युवती सुष्मा विकलाई नियन्त्रणमा लिएको थियो । दर्शन पोखरेल भने फरार भएका थिए ।

ललितपुर प्रहरीले पछि अनुसन्धानका क्रममा थप एक युवती भीमाकुमारी थापा र प्रहरी निरीक्षक शाहीका सवारीचालक महेन्द्र हमाललाई समेत नियन्त्रणमा लिएको थियो । निरीक्षक शाहीमाथि समेत अनुसन्धान गर्नुपर्ने देखिएपछि उनलाई पक्राउ गर्न प्रहरीले ललितपुर जिल्ला अदालतबाट अनुमति लिएको थियो ।

तर, शाहीलाई प्रहरीले पक्राउ गर्न सकेको छैन । उनी प्रहरीकै केही अधिकारीको संरक्षणमा रहेको आशंका गरिएको छ ।

पक्राउ परेका ताज, थापा, प्रहरी सहायक हवल्दार हमाल र विकलाई समेत ललितपुर प्रहरीले सीआईबीलाई बुझाएको छ ।

यो समूहले इटहरीदेखि काठमाडौंसम्मका व्यवसायीलाई हनी ट्रयापमा पारेको आशंका गरिएको छ । एक वर्षअघिको दरबारमार्गको बलात्कार घटनामा पनि हाल पक्राउ परेका ताजकै भूमिका शंकास्पद देखिएको छ । त्यसबाहेक दोलखाका अर्का एक व्यवसायी समेत जोडिएका छन् । उनीहरूसँग एसपी कमल थापाको ‘कनेक्सन’ देखिएपछि उनी पनि छानबिनको दायरामा तानिएका छन् ।

सीआईबीले दरबारमार्गको बलात्कार घटनाबारे समेत अनुसन्धान थालेको छ । व्यवसायीलाई हनी ट्रयापमा पार्न युवतीलाई अनेक माध्यमबाट सम्पर्क गर्न लगाउने र शारीरिक सम्बन्ध भएपछि रकमको ‘बार्गेनिङ’ गर्ने र रकम नदिए बलात्कारको उजुरी हाल्न लगाउने गरेको ललितपुर प्रहरीको अनुसन्धानका क्रममा खुलेको छ ।

सीआईबीले गम्भीर प्रकृतिको घटना अनुसन्धान गर्दै आएको छ । सीआईबीले हनी ट्रयापबारेको घटना अनुसन्धान गर्न लागेको यो पहिलोपल्ट हो ।

ललितपुर प्रहरीका प्रमुख एवं प्रहरी वरिष्ठ उपरीक्षक (एसएसपी) शेखर खनालले संगठित अपराध र अरू जिल्लामा समेत उनीहरूले हनी ट्रयापमा पारेर रकम असुल गरेको देखिएपछि सीआईबीलाई जिम्मा लगाइएको बताए ।

उनले भने, “यो संगठित गिरोह हो । उनीहरूको संलग्नता ललितपुर जिल्लाबाहेक पनि देखिन्छ । केही प्रहरी अधिकारीको भूमिका पनि शंकास्पद छ । त्यो अनुसन्धान सीआईबीबाट गर्दा अझ राम्रो हुन्छ ।”