काठमाडौं । काभ्रेपलाञ्चोकको रोशी गाउँपालिका–३, भञ्ज्याङगाउँमा सिलौटाको लोहोरो प्रहार गरी छोराले आमाको हत्या गरेका छन् ।

यही कात्तिक १६ गते अपराह्न करिब ४ बजे भञ्ज्याङगाउँकी ६९ वर्षीया माइली लामामाथि उनकै कान्छो छोरा २८ वर्षीय फुर्साङ लामाले लोहोरो प्रहार गरेका जिल्ला प्रहरी कार्यालय काभ्रेका प्रमुख एवं प्रहरी उपरीक्षक वसुन्धरा खड्काले जानकारी दिइन् ।

हत्या आरोपित लामालाई जिल्ला प्रहरी कार्यालय काभ्रेले मंगलबार पत्रकार सम्मेलन गरी सार्वजनिक गरेको हो ।

माइली लामा आफ्नै घरको भान्साकोठामा टाउकोमा चोट लागी मृतावस्थामा रहेको भन्ने सूचना पाएपछि प्रहरी टोली खटिएको थियो । त्यसपछि प्रारम्भिक अनुसन्धान गरी फुर्साङलाई पक्राउ गरिएको प्रहरी प्रहरी उपरीक्षक खड्काले जानकारी दिइन् ।

उनका अनुसार, फुर्साङले भान्साकोठामा सुतिरहेकी आमाले कानमा लगाएको सुनको रिङ र नगदको लोभले मसला पिस्ने सिलौटो ढुंगाको लोहोरोले टाउकोमा प्रहार गर्नुका साथै ढोकाको आग्लोले समेत हिर्काएर हत्या गरेको पाइएको थियो ।

फुर्साङले आमाको हत्या गरी उनले कानमा लगाएको सुनको रिङ र साथमा रहेको नगद समेत लिई घटनास्थलबाट फरार भएका थिए । फुर्साङलाई कात्तिक १८ गते पक्राउ गरिएको प्रहरी उपरीक्षक खड्काले बताइन् ।

पक्राउ परेका फुर्साङमाथि अनुसन्धान गर्न मंगलबार काभ्रे जिल्ला अदालतबाट सात दिनको म्याद थप भएको प्रहरीले जनाएको छ । हिमालयन टेली भ्वाइस