काठमाडौं । सञ्चालित २० वाणिज्य बैंकमध्ये सातवटाले लाभांश घोषणा गरेका छन् । कात्तिक १४ गतेसम्म एभरेस्ट, नबिल, ग्लोबल आइएमई, सानिमा, स्ट्यान्डर्ड चार्टर्ड, प्राइम र सिटिजन्स बैंकले लगानीकर्तालाई लाभांश घोषणा गरेका हुन् ।

यीमध्ये सबैभन्दा बढी लाभांश स्ट्यान्डर्ड चार्टर्ड बैंकले दिने भएको छ । यो बैंकले गत आर्थिक वर्ष २०८०/८१ को मुनाफाबाट कुल २५.५ प्रतिशत लाभांश घोषणा गरेको छ ।

हाल सञ्चालनमा २० वाणिज्य बैंक भए पनि १९ वटा मात्र धितोपत्र दोस्रो बजारमा सूचीकृत छन् । राष्ट्रिय वाणिज्य बैंक धितोपत्र दोस्रो बजारमा सूचीकृत छैन । यो बैंकले घोषण गरेको लाभांश नेपाल सरकारले प्राप्त गर्नेछ । राष्ट्रिय वाणिज्य बैंकको लाभांश सर्वसाधारणले पाउँदैनन् ।

कुन बैंकले कति दिए लाभांश ? 

स्ट्यान्डर्ड चार्टर्ड
स्ट्यान्डर्ड चार्टर्ड बैंकले गत आर्थिक वर्ष २०८०/८१ को मुनाफाबाट सेयरधनीलाई २५.५० प्रतिशत लाभांश दिने घोषणा गरेको छ । बैंकले असार मसान्तसम्मको चुक्ता पुँजीको ६.५० प्रतिशत बोनस सेयर र कर प्रयोजनसहित १९ प्रतिशत नगद लाभांश दिने निर्णय गरेको छ ।

यो लाभांश पारित भएपछि बैंकका सेयरधनीले प्रतिकित्ता १९ रुपैयाँका दरले नगद रकम प्राप्त गर्नेछन् । घोषणाअनुसार, बैंकको २०० कित्ता सेयर हुने सेयरधनीले थप १३ कित्ता सेयर प्राप्त गर्नेछन् ।

गत वर्ष यो बैंकले १९ प्रतिशत नगद लाभांश मात्र दिएको थियो । त्योभन्दा अघिको वर्ष बैंकले १६.५१ प्रतिशत नगद लाभांश दिएको थियो । 

नबिल बैंक
नबिल बैंकले गत आर्थिक वर्ष २०८०/८१ को सञ्चित मुनाफाबाट १० प्रतिशत नगद लाभांश दिने घोषणा गरेको छ । बैंकको एक कित्ता सेयर हुने सेयरधनीले १० रुपैयाँ प्राप्त गर्नेछन् । उक्त प्रस्ताव बैंकको आउँदो साधारणसभाबाट पारित भएपछि सेयरधनीले लाभांश प्राप्त गर्नेछन् ।

यो बैंकले गत वर्ष ११ प्रतिशत नगद लाभांश दिएको थियो । अघिल्लो वर्ष यो बैंकले ११.५ प्रतिशत नगद लाभांश र १८.५ प्रतिशत बोनस सेयर दिएको थियो ।

नबिल बैंकको यो वर्षको लाभांश १० वर्षयताकै कम हो । यो बैंकले विगतका वर्षमा ४८ प्रतिशतसम्म लभांश दिएको थियो ।

सिटिजन्स बैंक इन्टरनेसनल
सिटिजन्स बैंक इन्टरनेसनलले १८औँ वार्षिक साधारणसभामार्फत ४.२१ प्रतिशत लाभांश वितरण गर्ने प्रस्ताव पारित गरेको छ । यही कात्तिक १२ गते बैंकको साधारणसभा सम्पन्न गरिएको हो । साधारणसभाबाट पारित भएसँगै सेयरधनी बोनस सेयर प्राप्त गर्न योग्य भएका छन् ।

उक्त सभाबाट गत आर्थिक वर्ष २०८०/८१ को वितरणयोग्य मुनाफाबाट ०८१ असार मसान्तको चुक्ता पुँजी १४ अर्ब २० करोड नौ लाख ७४ हजार ६ रुपैयाँको ४ प्रतिशत बोनस सेयर वितरण गर्ने प्रस्ताव पारित गरिएको हो । कर प्रयोजनका निम्ति ०.२१ प्रतिशत नगद लाभांश पनि पारित गरिएको छ ।

बैंकले गत वर्ष ५.७९ प्रतिशत नगद लाभांश दिएको थियो । यो वर्ष दिएको बैंकको लाभांशदर १० वर्षयताकै न्यून हो ।

प्राइम कमर्सियल बैंक
प्राइम कमर्सियल बैंकले गत आर्थिक वर्ष २०८०/८१ को मुनाफाबाट सेयरधनीलाई ५ प्रतिशत नगद लाभांश वितरण गर्ने घोषणा गरेको छ । यो बैंकले गत वर्ष ८.९५ प्रतिशत लाभांश दिएको थियो । त्यसअघिको वर्ष १६.६३१३ प्रतिशत लाभांश दिएको थियो । 

सानिमा बैंक
सानिमा बैंकले गत आर्थिक वर्षको मुनाफाबाट सेयरधनीलाई कर प्रयोजनसहित ५.२६३२ प्रतिशत नगद लाभांश वितरण गर्ने घोषणा गरेको छ । प्रस्तावित लाभांश पारित गर्न बैंकले आउँदो मंसिर ४ गते साधारणसभा बोलाएको छ ।

साधारणसभा प्रयोजनका निम्ति बैंकले कात्तिक २५ गते एक दिन बुक क्लोज गरेको छ । कात्तिक २१ गतेसम्म सानिमा बैंकको सेयर खरिद गर्नेले प्रस्तावित लाभांश प्राप्त गर्नेछन् ।

गत वर्ष बैैंकले १४.७ प्रतिशत लाभांश दिएको थियो । त्यसअघिको वर्ष यो बैंकले १०.९८ प्रतितशत लाभांश दिएको थियो ।

एभरेस्ट बैंक
एभरेस्ट बैंकले प्रस्ताव गरेको लाभांश सेयरधनीलाई दिइसकेको छ । बैंकले ५.५३ प्रतिशत नगद लाभांश बैंक खातामा पठाइसकेको छ । बोनस सेयर डिम्याट खातामा पठाइसकेको छ ।

गत वर्ष यो बैंकले २०.५३ प्रतिशत लाभांश दिएको थियो । यो वर्ष भने बैंकको लाभांश केही मात्रामा घटेको छ । अघिल्लो वर्ष यो बैंकले २०.६८ प्रतिशत लाभांश दिएको थियो ।

ग्लोबल आइएमई बैंक
ग्लोबल आइएमई बैंकले गत आर्थिक वर्षको वितरणयोग्य मुनाफा तथा पुँजी समायोजन कोष समेतबाट सेयरधनीलाई ५.५ प्रतिशत बोनस सेयर वितरण गर्ने घोषणा गरेको छ । गत वर्ष यो बैंकले ९ प्रतिशत लाभांश दिएको थियो । बैंकले हाल प्रस्ताव गरेको लाभांश १० वर्षयताकै कम हो । अघिल्लो वर्ष बैंकले सेयरधनीलाई १३ प्रतिशत लाभांश दिएको थियो ।

निफ्राको निर्णयले लगानीकर्ता निराश 
नेपाल इन्फ्रास्ट्रक्चर बैंक (निफ्रा)ले सेयरधनीलाई यो वर्ष लाभांश वितरण नगर्ने निर्णय गरेको छ । बैंकले आफ्नो वित्तीय अवस्था थप सुदृढ र सबल बनाउन वितरणयोग्य मुनाफा सञ्चित गर्ने निर्णय गरेको हो ।

यो निर्णयले बैंकका लगानीकर्तालाई निराश बनाएको छ । बैंकले गत वर्षको असार मसान्तसम्म एक अर्ब २३ करोड ९८ हजार रुपैयाँ खुद मुनाफा गरेको थियो । उक्त मुनाफामा नियमनकारी निकाय नेपाल राष्ट्र बैंकको निर्देशनबमोजिम छुट्ट्याएर बाँकी रहेको ६७ करोड ९५ लाख ३४ हजार रुपैयाँ वितरणयोग्य मुनाफा सञ्चित गरिने बैंकले जानकारी दिएको छ ।

दोस्रो बजारमा सूचीकृत भएयता निफ्राले प्रत्येक वर्ष लाभांश दिँदै आएको थियो । गत वर्ष निफ्राले ४.२१०५ प्रतिशत नगद लाभांश दिएकोे थियो । निफ्राले त्यसअघि ०७९ मा पनि ४.२१०५ प्रतिशत नगद लाभांश दिएको थियो । ०७८ मा भने यो बैंकले सेयरधनीलाई ८ प्रतिशत बोनस सेयर र ४२ प्रतिशत नगद लाभांश दिएको थियो ।

यो पूर्वाधार विकासका निम्ति स्थापित छुट्टै बैंक हो । राष्ट्र बैंकले ‘क’, ‘ख’, ‘ग’ र ‘घ’ वर्गका बैंक तथा वित्तीय संस्थाभन्दा फरक निर्देशिकामार्फत यो बैंकको नियमन तथा सुपरिवेक्षण गर्दै आएको छ ।