काठमाडौं । कल्पतरू प्रज्ञा प्रतिष्ठानले महाकवि लक्ष्मीप्रसाद देवकोटाको ११६औं जन्मजयन्तीका अवसरमा दुई सर्जकलाई पुरस्कृत गरेको छ । 

बुधबार गोकर्णेश्वर नगरपालिका वडा नम्बर ६ को कार्यालयमा आयोजित कार्यक्रममा प्रतिष्ठानले यी दुवै स्रष्टालाई पुरस्कृत गरेको हो । प्रमुख अतिथि गोकर्णेश्वर नगरपालिका वडा नम्बर ६ का अध्यक्ष नवराज लामाले साहित्यकार वसन्त रिजाललाई ‘महाकवि देवकोटा कल्पतरू पुरस्कार’ तथा कलाकार जोगेन्द्र पानवालालाई ‘कल्पतरू प्रज्ञा सम्मान’ प्रदान गरे ।
 
देवकोटा कल्पतरू पुरस्कारका साथ नगद राशी २५ हजार रुपैयाँ पनि प्रदान गरियो । कार्यक्रममा पुरस्कृत साहित्यकार रिजालले ‘देवकोटा कल्पतरू पुरस्कार’ अक्षयकोषमा नगद एक लाख प्रदान गर्ने बताए । 

कार्यक्रममा केही समयअघि स्थापित प्रतिष्ठानका अध्यक्ष साहित्यकार नवराज पुडासैनी ‘ज्योत्सना’ले प्रतिष्ठानका काम बारे बोले ।

कार्यक्रममा वक्ताहरूले महाकवि देवकोटाको साहित्यिक योगदानबारे बोले । कार्यक्रम भन्दाअघि बाजागाजासहित वडा कार्यालयबाट सुरु भएको प्रभातफेरी गोकर्णेश्वर नगरपालिका वडा नम्बर ५ स्थित देवकोटा पार्कमा पुगेको थियो । उक्त अवसरमा उपस्थितहरूले महाकवि देवकोटाको सालिकमा माल्यार्पण गरेको थिए ।