काठमाडौं । नेपाल इन्फ्रास्ट्रक्चर बैंक (निफ्रा)ले सेयरधनीलाई यो वर्ष लाभांश वितरण नगर्ने भएको छ । बैंकले आफ्नो वित्तीय अवस्था थप सुदृढ र सबल बनाउन वितरणयोग्य मुनाफा सञ्चित गर्ने भएको हो ।

बैंकले गत वर्षको असार मसान्तसम्म एक अर्ब २३ करोड ९८ हजार रुपैयाँ खुद मुनाफा गरेको थियो ।

उक्त मुनाफामा नियमनकारी निकाय नेपाल राष्ट्र बैंकको निर्देशन बमोजिम छुट्याएर बाँकी रहेको ६७ करोड ९५ लाख ३४ हजार रुपैयाँ वितरणयोग्य मुनाफा सञ्चित गर्ने भएको जानकारी बैंकले दिएको छ ।

दोस्रो बजारमा सूचीकृत भएयता निफ्राले प्रत्येक वर्ष लाभांश दिँदै आएको थियो । गत वर्ष ४.२१०५ प्रतिशत नगद लाभांश दिएकोे निफ्राले त्यसअघि वि.सं. २०७९ मा पनि ४.२१०५ प्रतिशत नगद लाभांश नै दिएको थियो । वि.सं. २०७८ मा भने यो बैंकले सेयरधनीलाई ८.५ प्रतिशत नगद लाभांश दिएको थियो ।