काठमाडौं । इजरायली आक्रमणमा हसन नसरल्लाहको मृत्यु भएको ३२ दिनपछि हिजबुल्लाहले नयाँ प्रमुख घोषणा गरेको छ । मंगलबार नइम कासिमलाई संगठन प्रमुखको जिम्मेवारी दिइएको हो ।

हिजबुल्लाहले जारी गरेको विज्ञप्तिमा कासिमले सधैँ संगठनको सिद्धान्तको पालना गरेकाले उनलाई प्रमुखमा चयन गरिएको उल्लेख छ ।

कासिम संगठनमा दोस्रो नम्बरमा थिए । नसरल्लाहको मृत्युपछि कासिमले लेबनानका जनतालाई सम्बोधन गरेका थिए । यूएईको मिडिया हाउस इरेम न्यूजका अनुसार उनी इरानमा बस्दै आएका छन् ।

कासिमले अक्टोबर ५ मा बेरुत छाडेका थिए । उनलाई इरानका विदेशमन्त्रीको विमानमा लगिएको थियो । मिडिया रिपोर्टका अनुसार, इरानका नेताहरूले इजरायलको डरले कासिमलाई देश निकालाको आदेश दिएका थिए ।

कासिमभन्दा पहिले नसरल्लाहका भाइ हासेम सैफिद्दीनको नाम हिजबुल्लाहको प्रमुख बन्ने दौडमा अगाडि थियो । तर, उनको पनि इजरायली हवाई आक्रमणमा मृत्यु भएको थियो । उनको मृत्युको पुष्टि इजरायलका प्रधानमन्त्री बेन्जामिन नेतन्याहुले नै गरेका थिए ।

को हुन् हिजबुल्लाहका नयाँ प्रमुख, नइम कासिम ?

कासिमको जन्म लेबनानको काफर किला गाउँमा सन् १९५३ मा भएको थियो । सन् १९७० मा कासिम लेबनानमा शिया अमल आन्दोलनको हिस्सा बनेका थिए । 

कासिमपछि १९८० को दशकमा हिजबुल्लाह आन्दोलनमा संलग्न भएका थिए । उनी संगठनका संस्थापक सदस्यहरूमध्ये एक थिए ।

कासिमले दशकौँदेखि बेरुतमा धार्मिक शिक्षा दिइरहेका छन् । कासिम सन् १९९१ मा हिजबुल्लाहका उपमहासचिव बनेका थिए । उनी हिजबुल्लाहको सुरा काउन्सिलका सदस्य पनि हुन् ।

रोयटर्सबाट ।