काठमाडौं । यो वर्षको दसैँमा नेपाली चलचित्रले उत्साहपूर्वक व्यापार गरेका छन् । अघिल्ला वर्षका दसैँका तुलनामा यसपालि नेपाली चलचित्रले धेरै ग्रसकलेक्सन गरेका हुन् ।

यो वर्षको दसैँमा नेपाली चलचित्रमा ३५ देखि ४० करोड रुपैयाँबराबरको ग्रसकलेक्सन भएको वितरक तथा डीएसीएनका सञ्चालक अशोक शर्मा बताउँछन् ।

उक्त अवधिमा ‘बेहुली फ्रम मेघौली’, ‘छक्का पञ्जा–५’, ‘१२ गाउँ’ र ज्वाइँ साब’ले ३५ देखि ४० करोड रुपैयाँ ग्रसकलेक्सन गरेका थिए ।

“हालसम्मका दसैँमा भन्दा यो वर्षको दसैँ अवधिमा नेपाली चलचित्र धेरै चलेका छन् । यसअघिका दसैँमा यति धेरै ग्रसकलेक्सन कहिल्यै भएको थिएन,” अशोक बाह्रखरीसँग भन्छन्, “बेहुली फ्रम मेघौली रिलिज भएदेखि गत हप्तासम्म करिब ४० करोड रुपैयाँ ग्रसकलेक्सन भएको छ ।”

दुई चलचित्र एकैपटक मजाले चल्न सक्छन् भन्ने यो दसैँले पुष्टि गरेको उनी बताउँछन् । “दुईवटा चलचित्र एकैपटक रिलिज हुँदा शो पुग्छ । त्यसैले दुईवटा सिनेमा एकैदिन रिलिज गर्न डराउनु पर्दैन,” उनी भन्छन्, “तर, छुट्टाछुट्टै जानराका सिनेमा हुनुपर्छ । एउटै जानरा भयो भने त्यसले मार खान्छ ।”

यो वर्ष कमेडी जानरामा ‘छक्का पञ्जा’ र ‘१२ गाउँ’ एक्सनमा आएकाले दुवै चलचित्रलाई एकले अर्कोलाई खासै असर नगरेको उनी बताउँछन् । “तीन वा त्योभन्दा धेरै चलचित्र चलेको अवस्थामा भने शो पाउँदैन । थोरै शो पाएपछि हाउसफुल भए पनि व्यापार राम्रो हुँदैन,” अशोक भन्छन् ।

यो वर्ष घटस्थापनाका दिन ‘बेहुली फ्रम मेघौली’ र फूलपातीको अवसर पारेर रिलिज गरिएका ‘छक्का पञ्जा–५’, ‘१२ गाउँ’ र ज्वाइँ साब’ले राम्रो व्यापार गर्दा यसअघिका दसैँको ग्रसकलेक्सनलाई पछि पारेको हो ।

‘छक्का पञ्जा–५’, ‘१२ गाउँ’ र ज्वाइँ साब’ अझै प्रदर्शन भइरहेका छन् । ‘छक्का पञ्जा–५’ र ‘१२ गाउँ’ हालसम्म उच्च शो र लोभलाग्दो अकुपेन्सीसहित प्रदर्शन भइरहेका छन् ।