काठमाडौं । यूईएफए च्याम्पियन्स लिगमा साविक विजेता रियाल मड्रिडले साविक उपविजेता बोरुसिया डर्टमन्डविरुद्ध २–० ले पछि परेको स्थिति उल्ट्याउँदै जित निकालेको छ ।

रियालले मंगलबार राति घरेलु मैदान सान्टियागो बर्नबेउमा पहिलो हाफमा २–० ले पछि परेको स्थिति उल्ट्याउँदै ५–२ को जित निकालेको हो । रियालले पाँचै गोल दोस्रो हाफमा गर्यो । रियालको जितमा भिनिसियस जुनियरले ह्याट्रिक गरे । 

खेलको ३०औँ मिनेटमा डोन्यल मलेनले गोल गर्दै पाहुना टिमलाई अग्रतामा राखेका थिए । त्यसको चार मिनेटपछि जेमी बाइनोइ–जिटेन्सले डर्टमन्डको अग्रता दोब्बर बनाए । डर्टमन्डले खेलको ५९ मिनेटसम्म २–० को अग्रता बनाएको थियो । 

६०औँ मिनेटमा एन्टोनियो रुडिगरले गोल गर्दै रियाललाई २–१ को अवस्थामा ल्याए । त्यसको दुई मिनेटपछि नै भिनिसियस जुनियरको गोलमा रियाल खेलमा फर्कियो । ८३औँ मिनेटमा लुकास भाजक्वेजले गोल गर्दै रियाललाई ३–२ को अग्रतामा राखे । यस्तै, ८६औँ मिनेटमा भिनिसियसको गोलमा रियालले अग्रतालाई ४–२ मा राखेको थियो । इन्जुरी समयमा भिनिसियसले ह्याट्रिक पूरा गर्दा रियालले ५–२ को सानदार पुनरागमन जित निकालेको हो ।

जितसँगै तीन खेलबाट ६ अंक जोडेको रियाल च्याम्पियन्स लिग पहिलो चरणको नवौँ स्थानमा छ । रियाल यसअघि फ्रेन्च क्लब लिलसँग पराजित भएको थियो । समान खेलबाट ६ नै अंक जोडेको डर्टमन्ड भने तालिकाको पाँचौं स्थानमा छ । 

मंगलबार राति नै भएका अन्य खेलमा आर्सनलले सख्तर डोनेस्कलाई १–० ले, एस्टोन भिल्लाले बोलोग्नालाई २–० ले र भीएफबी स्टुटगार्टले युभेन्ट्सलाई १–० ले पराजित गरेका छन् ।