काठमाडौं । स्वास्थ्य बिमा बोर्डका अध्यक्ष डा. गुणराज लोहनीले बुझाएको राजीनामा ३५ दिन बितिसक्दा पनि सरकारले कुनै निर्णय गरेको छैन । डा. लोहनीले भदौ २८ गते स्वास्थ्य तथा जनसंख्या मन्त्रालयमा राजीनामापत्र बुझाएका थिए ।
 
स्वाथ्यमन्त्रीको सचिवालयमा बुझाइएको पत्र स्वास्थ्यमन्त्री प्रदीप पौडेलले असोज पहिलो साता नै मन्त्रिपरिषद्‌मा लगेका थिए । प्रक्रियाअनुसार नै मन्त्रिपरिषद्‌मा पेस गरे पनि हालसम्म कुनै निर्णय नआएको मन्त्रालयका प्रवक्ता डा. प्रकाश बुढाथोकीले जानकारी दिए ।

२०८० मंसिर १४ मा बोर्ड अध्यक्ष नियुक्त भएका डा. लोहनीले तीन वर्ष दुई महिना कार्यकाल बाँकी रहँदै राजीनामा दिएका थिए । बोर्ड र कार्यकारी कर्मचारीहरूबीचको बेमेलका कारण राजीनामा दिएको बताइए पनि राजीनामाको ठोस कारणबारे डा. लोहनीले अहिलेसम्म प्रष्ट बताएका छैनन् ।
 
बोर्डका यसअघिका अध्यक्ष डा. सेनेन्द्रराज उप्रेतीले पनि कार्यकाल दुई वर्ष बाँकी छँदै स्वेच्छिक राजीनामा दिएका थिए । २०७७ साउन १९ गते बोर्ड अध्यक्ष नियुक्त भएका डा. उप्रेतीले दुई वर्ष कार्यकाल बाँकी रहँदै २०७९ माघ २५ गते राजीनामा दिएका थिए ।

उनको राजीनामा पनि मन्त्रिपरिषद्ले डेढ महिनापछि २०७९ चैत १० गते मात्रै स्वीकृत गरेको थियो । त्यो समय बिमा बोर्ड आठ महिना अध्यक्षबिहीन बनेको थियो ।