काठमाडौं । असोज दोस्रो साताको बाढीपहिरोका कारण बिमा कम्पनीहरूमा करिब नौ अर्ब रुपैयाँको दाबी परेको छ । असोज १० गतेदेखि २९ गतेसम्म बिमा कम्पनीहरूमा आठ अर्ब ९८ करोड ३० लाख रुपैयाँको दाबी परेको हो ।

नेपाल बिमा प्राधिकरणलाई बिमा कम्पनीहरूले बुझाएको विवरणअनुसार बाढीपहिरोबाट तीन हजार २४४ दाबी परेको छ । यसमध्ये ९७ वटा दाबीबापतको १७ करोड २८ लाख २८ हजार रुपैयाँ भुक्तानी भइसकेको छ । प्राधिकरणका अनुसार बाढीपहिरोबाट प्रभावित कम्पनी तथा व्यक्तिको सबैभन्दा बढी दाबी सिद्धार्थ प्रिमियर इन्स्योरेन्समा परेको छ । यो कम्पनीमा एक अर्ब ९५ करोड २९ लाख रुपैयाँको दाबी परेको छ ।

दि ओरियन्टल इन्स्योरेन्समा एक अर्ब ४५ करोड ६८ लाख रुपैयाँ दाबी परेको छ । त्यसैगरी हिमालयन एभरेष्ट इन्स्योरेन्स कम्पनीमा एक अर्ब आठ करोड रुपैयाँको दाबी परेको छ । यी तीन कम्पनीबाहेक अरूमा भने एक अर्बभन्दा कम दाबी परेको छ ।  

दाबी परेकोमध्ये ६ कम्पनीले १७ करोड २८ लाख २८ हजार रुपैयाँ भुक्तानी गरेका छन् । यसरी भुक्तानी गर्नेमा हिमालयन एभरेष्ट, नेको, शिखर, आईजीआई प्रुडेन्सियल, सानिमा जीआईसी र प्रभु इन्स्योरेन्स छन् ।

यी ६ मध्ये सबैभन्दा बढी शिखर इन्स्योरेन्सले भुक्तानी गरेको छ । यो कम्पनीमा ४०४ दाबी संख्याको ९३ करोड ३६ लाख आठ हजार रुपैयाँ बराबरको दाबी रकम परेको छ । तर, कम्पनीले ८९ दाबीबापतको १७ करोड २४ लाख ७१ हजार रुपैयाँ भुक्तानी गरेको प्राधिकरणले जनाएको छ ।

सबैभन्दा बढी दाबी भुक्तानी सम्पत्ति बिमाको भएको छ । सम्पत्ति बिमातर्फ ६ अर्ब ६८ करोड ६७ लाख रुपैयाँ दाबी परेकोमा १६ करोड १० लाख २१ हजार रुपैयाँ भुक्तानी भइसकेको छ ।

प्राधिकरणले बिमा कम्पनीहरूलाई प्रत्येक हप्ता बाढीपहिरोबाट भएको क्षतिको दाबी भुक्तानी तथा दाबी रकमको विवरण बुझाउन निर्देशन दिएको छ । सोहीअनुसार बिमा कम्पनीहरूले सात–सात दिनमा प्राधिकरणमा यस्तो विवरण बुझाउँदै आएका छन् ।