काठमाडौं । चालु आर्थिक वर्ष २०८१/०८२ को दुई महिनामा चालु खाता एवम् शोधनान्तर स्थिति बचत गत वर्षको तुलनामा दोब्बरले बढेको छ । नेपाल राष्ट्र बैंकले जारी गरेको तथ्यांकअनुसार चालु खाता र शोधनान्तर स्थिति नै दोब्बर भएको हो ।

भदौ मसान्तसम्म चालु खाता ४९ अर्ब ६९ करोडले बचतमा छ । गत वर्षको सोही अवधिमा चालु खाता २३ अर्ब ९७ करोड रुपैयाँले बचतमा थियो । एक वर्षको अन्तरालमा चालु खाता २५ अर्ब ७२ करोडले वृद्धि भएको राष्ट्र बैंकले जनाएको छ ।

त्यस्तै, भदौ मसान्तसम्म शोधनान्तर स्थिति एक खर्ब एक अर्ब ७७ करोडले बचतमा छ । गत वर्षको सोही अवधिमा शोधनान्तर स्थिति ५५ अर्ब १० करोड रुपैयाँले बचतमा थियो । एक वर्षमा मुलुकको शोधनान्तर स्थिति ४५ अर्ब ९० करोड रुपैयाँले वृद्धि भएको हो ।

चालु खाता घाटाले अरू देशहरूबाट खुद सापटी लिइएको भन्ने बुझिन्छ । चालु खाता बचतमा रहे अरू देशहरूलाई खुद सापटी दिइएको बुझिन्छ । चालु खाता घाटा सुधार हुँदै जानुले हाल नेपालले अरू देशहरूबाट लिएको खुद सापटी घटाउँदै गएको देखिन्छ ।

राष्ट्र बैंकका अनुसार, निश्चित समयावधिभित्र आवासीय र गैरआवासीय व्यक्ति–संस्थाबीच भएका आर्थिक तथा वित्तीय कारोबारको सारांश नै शोधनान्तर स्थिति हो ।

शोधनान्तर बचत भएमा बाह्य क्षेत्र कारोबारबाट विदेशी मुद्रा आप्रवाह बढ्छ । घाटा भएमा विदेशी मुद्रा देशबाट बाहिर बढी गएको बुझिन्छ ।