इजरायली सुरक्षा फौजले आइतवार दक्षिणी लेबनानस्थित संयुक्त राष्ट्रसंघीय अन्तरिम शान्ति सेना ९युनिफिल०को शिविरमा गरेको अतिक्रमणको विश्वभर निन्दा भएको छ । संयुक्त राष्ट्रसंघ, युरोपियन युनियनलगायतले इजरायली अतिक्रमणको निन्दा गर्दै त्यसलाई स्वीकार गर्न नसकिने बताएका छन् ।

हालै इरान समर्थित कट्टरपन्थी छापामार संगठन हिजबुल्लाले आक्रमण गरेपछि इजरायलले लेबनानस्थित हिजबुल्लाको ठेगानाहरूमा प्रत्याक्रमण सुरु गरेको थियो । गत अक्टोबर ७ मा प्यालेस्टाइनी छापामार संगठन हमासले इजरायलमा गरेको आक्रमणपछि सुरु भएको युद्धमा हिजबुल्लाह सामेल भएपछि स्थिति झन् बिग्रेको देखिन्छ ।

लेबनानमा शान्ति स्थापनाका लागि सन् १९७८ मा युनिफिलको स्थापना गरिएको थियो । बिस्तारै युनिफिल शान्ति स्थापनाका अतिरिक्त मानवीय सहायता उपलब्ध गराउने कार्यमा पनि संलग्न हुन थाल्यो । अहिले लेबनानको जनजीवन सहज र सुरक्षित बनाउन युनिफिलको योगदान महत्त्वपूर्ण रहेको छ ।

पछिल्लो समय विशेषगरी प्रधानमन्त्री बेन्जामिन नेतान्याहुले  सत्ताको लगाम समातेपछि   इजरायल अपेक्षाकृत आक्रामक हुँदै गएको छ । अर्कातिर, इरानजस्तो मुलुकले पनि इजरायल विरोधी छापामार संगठनहरूलाई हरप्रकारको सहयोग दिँदै आएका छन् । यी दुवै पक्षको क्रियाकलापका कारण मध्यपूर्व पुनः अशान्त हुनपुगेको छ ।

हिजबुल्लाको पछिल्लो आक्रमणपछि इजरायलले लेबनानमा हवाईका साथै स्थल मार्गबाट पनि आक्रमण गरिरहेको छ । त्यही क्रममा शान्ति सेनाको चौकीमा आक्रमण गरेको हो । हिजबुल्ला छापामारहरूले युनिफिलका सैनिकलाई ‘मानव ढाल’ बनाएको आरोप लगाउँदै शान्ति सेना हटाउन इजरायलले माग गरेको छ । 

युनिफिललाई हिजबुल्लाले ‘मानव ढाल’ बनाएकै भए पनि इजरायलले संयुक्त राष्ट्रसंघीय शान्ति सेनाको परिसरमा आक्रमण गर्नु हुँदैनथ्यो । इजरायलको यस आक्रामक क्रियाकलाप रोकिएन भने विश्व शान्ति नै खलबलिने देखेर नै संयुक्त राष्ट्रसंघ र युरोपियन युनियनलगायतका संस्थाहरूले आक्रमण रोक्न आग्रह गरेको हुनुपर्छ ।  

युनिफिलमा सैनिक पठाउने नेपाललगायतका ३३ मुलुकहरूले पनि आक्रमणको निन्दा गर्दै युद्धरत पक्षहरूलाई अन्तर्राष्ट्रिय कानुनको मर्यादा राख्न शान्ति सैनिकहरूको सुरक्षाको प्रत्याभूति गर्न आह्वान गरेका छन् ।  उनीहरूले जारी गरेको वक्तव्यमा शान्ति सैनिकलाई उनीहरूको कर्तव्य पूरा गर्नमा कुनै बाधा नपार्न पनि आग्रह गरिएको छ ।

हिजबुल्लाको अर्घेल्याइँको समर्थन नगर्ने कतिपय अरब मुलुकमा इजरायलको सुरुको कारबाहीप्रति मौन समर्थनसमेत देखिएको थियो । तर,युनिफिलमाथिको आक्रमणले भने इजरायली कारबाहीप्रतिको समर्थन घटाएको छ । यसैगरी,   हिजबुल्लाविरुद्धको इजरायली कारबाहीको नैतिक वैधतामा पनि प्रश्न उठेको छ । लेबनानमा तैनाथ शान्ति सेनाबाट हटाउन होइन इजरायलको आक्रामक क्रियाकलाप रोक्न र हिजबुल्ला वा हमासजस्ता चरमपन्थी संगठनहरूलाई निशस्त्र बनाउन शान्ति सेनालाई  अझ सशक्त बनाउनुपर्छ ।  

युनिफिलका चौकीमा आक्रमण गरेकोमा इजरायलको निन्दा गरेर अन्तर्राष्ट्रिय समुदाय शान्तिका पक्षमा उभिएको छ । यसमा नेपाल पनि अन्तर्राष्ट्रिय समुदायसँगै उभिनु स्वाभाविकै हो । अमेरिकालगायत शक्तिशाली राष्ट्रहरूले स्पष्ट शब्दमा इजरायललाई  तत्काल युद्धविराम गर्न दबाब दिउन् र भनुन् - शान्ति सैनिकमाथिको आक्रमण कुनै पनि बहानामा स्वीकार्य हुनसक्दैन !