खार्तुम । दक्षिणी खार्तुमको मुख्य बजारमा भएको हवाई आक्रमणमा परी कम्तीमा २३ सर्वसाधारणको मृत्यु हुनुका साथै अन्य ४० जना घाइते भएका स्थानीय स्वयंसेवी तथा गैरसरकारी समूहहरूले जनाएका छन् ।

“हिजो खार्तुमको अल–सौक अल–मार्काजी (केन्द्रीय बजार)मा लडाकु विमानहरूले बमबारी गर्दा उक्त घटना भएको हो,” स्थानीय स्वयंसेवी दक्षिण खार्तुम आपत्कालीन समूहले आइतबार एक विज्ञप्तिमा उल्लेख गरेको छ ।

“घाइतेहरूलाई उपचारका लागि बसाइर, एलराजी र अलराकी अस्पतालमा सारिएको छ । घाइतेमध्ये केहीको अवस्था गम्भीर छ,” विज्ञप्तिमा भनिएको छ । हालसम्म कुनै पनि समूहले आक्रमणको जिम्मेवारी लिएको छैन ।

सैन्य स्रोत र साक्षीहरूका अनुसार, सुडानी सशस्त्र बल (एसएएफ)ले राजधानी खार्तुममा सेप्टेम्बर २६ मा अर्धसैनिक र्‍यापिड सपोर्ट फोर्स (आरएसएफ) विरुद्ध महत्त्वपूर्ण आक्रमण सुरु गरेको थियो ।

संयुक्त राष्ट्र संघ समन्वय कार्यालयले सुडान सन् २०२३ अप्रिल १५ देखि एसएएफ र आरएसएफ बीचको हिंसात्मक द्वन्द्वमा फसेको जनाएको छ । यसको परिणामस्वरूप यहाँ लगभग २० हजार जनाको मृत्यु भएका र हजारौँ घाइते भएका छन् । रासस/सिन्ह्वा