काठमाडौं । खेलको दोस्रो मिनेटमै १–० ले पछि परेको अवस्था उल्ट्याउँदै ब्राजिलले फिफा विश्वकप–२०२६ अन्तर्गत चिलीविरुद्ध २–१ को पुनरागमन जित निकालेको छ । 

शुक्रबार बिहान चिलीमा भएको खेलमा घरेलु टिमले दोस्रो मिनेटमै अग्रता बनाएको थियो । चिलीका एडुर्डो भार्गासले गोल गर्दै घरेलु टिमलाई अग्रता दिलाएका थिए । 

तर, पहिलो हाफको इन्जुरी समयमा इगोर जिससले गोल गर्दै ब्राजिललाई खेलमा फर्काए । खेलको निर्धारित समय सकिन एक मिनेट बाँकी रहँदा लुइस हेनरिकले गरेको गोल निर्णायक बनेपछि ब्राजिलले २–१ को जित पक्का गरेको हो ।

छनोटमा नौ खेल खेलेको ब्राजिलको यो चौथो जित हो । तालिकाको चौथो स्थानमा उक्लिएको ब्राजिलले १३ अंक जोडेको छ । जुन शीर्ष स्थानमा आसिन अर्जेन्टिनाको भन्दा ६ अंकले कम हो ।

समान खेलबाट पाँच अंक जोडेको चिली भने तालिकाको नवौँ स्थानमा छ । यो हारसँगै चिलीको विश्वकप सम्भावना पनि कमजोर बनेको छ ।