काठमाडौं । नेपाल राष्ट्र बैंकका गभर्नर महाप्रसाद अधिकारीमाथि छानबिन गर्न गठित जाँचबुझ समिति साढे दुई वर्षपछि सरकारले रद्द गरेको छ । आइतबार बसेको मन्त्रिपरिषद् बैठकले शेरबहादुर देउवा नेतृत्वको सरकारले २०७८ चैत २४ गते गठन गरेको समिति साढे दुई वर्षपछि रद्द गरेको हो ।

त्यसबेला अर्थमन्त्री जनार्दन शर्मा थिए । सरकारलाई असहयोग गरेको भन्दै समिति गठन गरेर गभर्नर अधिकारीलाई निलम्बन समेत गरिएको थियो । तर, अदालतले पछि उनलाई पदबहाली गरेको थियो ।

गभर्नर अधिकारीमाथि जाँचबुझ गर्न सर्वोच्च अदालतका पूर्वन्यायाधीश पुरुषोत्तम भण्डारीको नेतृत्वमा तीन सदस्य समिति गठन भएको थियो । समिति सदस्यमा डा. सूर्य थापा र चन्द्रकान्त पौडेल रहेका थिए । समितिलाई एक महिनाभित्र छानबिन प्रतिवेदन बुझाउन भनिएको थियो ।