काठमाडौं । साहित्यकार सुमन वर्षाको कथाकृति ‘अभ्यन्तर’ एक कार्यक्रमका बीच लोकार्पित भएको छ । बिहीबार प्रज्ञा प्रतिष्ठानको पारिजात सभाकक्षमा आयोजित कार्यक्रममा प्रमुख अतिथि प्रा.डा. अभि सुवेदी, प्रा.डा. ज्ञानू पाण्डे, नयनराज पाण्डेलगायतले कृति सार्वजनिक गरे ।

प्रमुख अतिथि प्रा.डा. सुवेदीले कृति लोकार्पण गर्दै सुमनको साहित्यिक योगदानको चर्चा गरे । उनले भने, “सुमनले कतिपय कथा फरक दृष्टिकोण र शैलीका साथ लेखेकी छन् । कथामा उनले आफ्नो लेखकीय स्वतन्त्रताको उच्च प्रयोग गरेकी छन् ।”

साहित्यकार प्रा.डा. ज्ञानू पाण्डेले कृतिकारको चर्चा गर्दै सुमनले समाजकै विविध विषयवस्तुमाथि कथा लेखेर समाजको अध्ययन गर्न खोजेको बताइन् । उनले कथामा समाजको चित्रण राम्रो रहेको बताउँदै भनिन्, “साहित्यकार समाजका मनोचिकित्सक हुन् । तिनले समाजका अन्तरङ घाउलाई साहित्यमार्फत उजागर गरेर त्यसको उपचारको बाटो देखाइदिन्छ ।”

आख्यानकार नयनराज पाण्डेले कथाकृतिमाथि पाठकीय मन्तव्य राख्दै सुमनका कतिपय कथाहरू फरक शैलीको भएको बताए । उनले सुमनलाई साहसी कथाकार भन्दै उनले हरेक कथामा फरक खालका विषयवस्तुको उठान गरेको बताए ।

कार्यक्रममा कथाकार सुमन वर्षाले आफ्नो कथा लेखनबारे बताइन् । उक्त अवसरमा विनोदचन्द्र वन्त, जगत् तिमिल्सिना, डा. सविना बस्नेत, शिखा बुक्सका पुष्पराज पौडेलले बोले ।

सुमनको दोस्रो उपन्यास अभ्यन्तर शिखा बुक्सले बजारमा ल्याएको हो ।