काठमाडौं । असोज ११ र १२ गतेको बाढीपहिरोले सबैभन्दा धेरै काभ्रेपलाञ्चोकमा क्षति भएको छ । काभ्रेमा मंगलबारसम्म ६३ जनाको मृत्यु, २१ जना घाइते र ९ जनाको अवस्था अज्ञात रहेको गृह मन्त्रालयको तथ्यांक छ । 

जिल्लाका पाँच पालिकामा गरी सोमबारसम्म २७ वटा विद्यालय क्षतिग्रस्त भएको शिक्षा विज्ञान तथा प्रविधि मन्त्रालयको तथ्यांक छ । तीमध्ये धुलिखेल नगरपालिकाका तीन वटा विद्यालय पहिरोमा पुरिएको र दुई वटा आंशिक रूपमा क्षतिग्रस्त भएको विवरण छ । 

पाँचखाल नगरपालिकाका तीन वटा विद्यालयमा आंशिक क्षति भएको छ । तेमाल गाउँपालिकाको एउटा विद्यालय पूर्ण र ६ वटा आंशिक रूपमा क्षतिग्रस्त भएका छन् । 

रोशी गाउँपालिकाको एउटा विद्यालय पूर्ण रूपमा क्षतिग्रस्त भएको छ भने आठ वटा विद्यालयमा आंशिक क्षति पुगेको छ । यस्तै, भुम्लु गाउँपालिकाका तीन वटा विद्यालय आंशिक रूपमा क्षतिग्रस्त भएका छन् ।