काठमाडौं । नेपालमा पहिलोपटक आयोजना हुन लागेको एभरेस्ट महिला भलिबल लिग सोमबारदेखि सुरु हुँदै छ । काठमाडौंको त्रिपुरेश्वरस्थित राष्ट्रिय खेलकुद परिषद् (राखेप) परिसरमा रहेका कभर्ड हलमा हुने प्रतियोगितामा देशभरका विभिन्न सहरका नाममा ६ टोलीले प्रतिस्पर्धा गर्ने छन् ।

प्रतियोगिताको पूर्वसन्ध्यामा आयोजित पत्रकार सम्मेलनमा सबै टिमका कप्तान तथा प्रशिक्षकले जितको लक्ष्य सुनाए ।

प्रतियोगितामा काठमाडौं स्पाइकर्स राष्ट्रिय टिमका मुख्य प्रशिक्षकसमेत रहेका जगदिश भट्टको प्रशिक्षणमा छ । यो टोली राष्ट्रिय टिमकी नियमित सदस्य उषा भण्डारीको कप्तानीमा कोर्ट उत्रने छ ।

प्रशिक्षक भट्टले प्रतियोगितामा विदेशी खेलाडीको आगमनले सबै खेलहरू प्रतिस्पर्धात्मक बन्ने प्रतिक्रिया दिए ।

“एक प्रशिक्षकको रूपमा टिमलाई विजयी गराउन हरसम्भव तयारी गराएका छौँ । टिम संयमित छ । प्रतियोगिता प्रतिस्पर्धात्मक बन्ने आशा छ । विदेशी खेलाडीको आगमनले टिममा ऊर्जा थपेको छ,” भट्टले भने ।

यस्तै, टिमकी मार्की खेलाडीसमेत रहेकी उषाले पनि प्रतियोगिता प्रतिस्पर्धात्मक हुने बताइन् ।

पत्रकार सम्मेलनमा ललितपुर क्विन्सका सहायक प्रशिक्षक योगेश हमालले टिमबाट राम्रो प्रदर्शनको अपेक्षा रहेको बताए ।

“थाइल्यान्डबाट तीन खेलाडी आएका छन् । प्रशिक्षण सोचेजसरी गर्न पाएका छैनौँ । तर, टिमले राम्रो प्रदर्शन गर्न अपेक्षा,” उनले भने ।

यस्तै, ललितपुरकी मार्की खेलाडी लिबेरो सलिना श्रेष्ठले प्रतियोगिताका निम्ति आफ्नो टिम उत्साहित रहेको बताइन् ।

“थाइल्यान्डका अनुभवी खेलाडी टिमसँग जोडिएका छन् । ट्यालेन्ट हन्टबाट पनि राम्रो खेलाडीको आगमन भएको छ । टिम राम्रो छ । प्रतियोगिताका निम्ति उत्साहित छौँ ।”

प्रतियोगितामा मधेस प्रदेश भरत यादवको प्रशिक्षणमा छ । उनी यस प्रतियोगिताकाले नेपाली भलिबलको विकासमा टेवा पुर्‍याउने बताउँछन् ।

“यस प्रतियोगिताले नेपाली भलिबलको विकासमा टेवा पुग्ने आशा छ । यसमा विदेशी खेलाडीको आगमन हुँदा घरेलु खेलाडीलाई राम्रो एक्सपोजर हुने छ,” यादवले भने ।

यस्तै, टिमकी मार्की खेलाडी निरुता ठगुन्नाले नेपालमा यसप्रकार लिग हुँदा खेलाडीले प्रदर्शन देखाउने मञ्च पाउने बताइन् ।

गण्डकी थन्डर्सका मुख्य प्रशिक्षक रूपेश विष्टले विदेशी खेलाडीको आगमन हुँदा भलिबलको माहोल नै बेग्लै हुने बताए । 

“हिजोका दिनमा हामी स्थानीय खेलाडीहरूमा सिमित थियौँ । तर, अब विदेशी खेलाडीहरू आएपछि भलिबलको माहोल नै बेग्लै हुने अनुमान गरेका छौँ । खेलाडीहरूका लागि यो एउटा सिक्ने अवसर हो । हेरौँ यो नयाँ सुरुआतले कस्तो परिणाम ल्याउने छ,” उनले भने ।

गण्डकीकी कप्तान सरस्वती चौधरीले लिग विदेशी खेलाडीबाट सिक्ने अवसर भएको बताइन् ।

“एकदमै उत्साहित छौँ । भारत, रुस र क्यानडाका समान एक खेलाडीहरू भित्र्याएका छौँ । विदेशी खेलाडीबाट सिक्न पाउँने छौँ, नयाँ खेलाडीहरूले पनि आफूलाई प्रमाणित गर्ने अवसर पाउँदै छन् । खेलको स्तरमा वृद्धि हुन्छ जस्तो लाग्छ,” चौधरीले भनिन् ।

प्रतियोगितामा चितवन शक्ती अर्जुन घिमिरेको प्रशिक्षणमा छ । उनले यो प्रतियोगिता भलिबलमा भविष्य देखिरहेका खेलाडीहरूका लागि भएको बताए । 

“नाम, काम र दामको सुरुआतका रूपमा लिएको छु । भलिबलबाट भविष्य बनाउँछु भन्नेहरूका लागि प्रेरणाको स्रोत हो यो प्रतियोगिता । भारतीय र रुसी खेलाडीले गर्दा टोली बलियो बनेको छ । प्रतियोगिताका लागि उत्साहित छौँ,” घिमिरेले भने ।

यस्तै, चितवनी खेलाडी जेनिशा विश्वकर्माले प्रतियोगिताका लागि आफ्नो टिम उत्साहित रहेको बताइन् ।
 
यस्तै, कर्णाली यश्विसका मुख्य प्रशिक्षक कुमार राईले प्रतियोगिताका निम्ति आयोजकलाई धन्यवाद दिए ।

“महिला भलिबलको विकासका लागि यतिको वर्ष लाग्दै गर्दा व्यक्तिगतरूपमा पनि म यसमा आयोजकलाई धन्यवाद दिन चाहन्छु । साँच्चिकै अब महिला सशक्तीकरणको पालो आएको छ । खेलमा हार जित स्वाभाविक हो । राम्रा खेलाडीहरू भित्रिएका छन् । हार जित भन्दा पनि महिला भलिबल विकास मेरो पहिलो प्राथमिकता हो,” उनले भने ।

कर्णालीकी मार्की खेलाडी सुमित्रा रेग्मीले टिमबाट राम्रो प्रदर्शनको आशा राखेको बताइन् ।

 प्रतियोगिताको उद्घाटन खेलमा सोमबार असोज १४ गते काठमाडौं स्पाइकर्सले ललितपुर क्विन्सको सामना गर्ने छ । खेल दिउँसो ३ः४५ मा सुरु हुने छ । दिनको दोस्रो खेलमा मधेस युनाइटेड र कर्णाली यसभिसले ५ः४५ बजे एकअर्कासँग प्रतिस्पर्धा गर्दा ७ः४५ मा सुरु हुने तेस्रो खेलमा चितवन शक्ति र गण्डकी थन्डर्स आमनेसामने हुने छन् ।

प्रतियोगिता असोज १४ देखि १९ गतेसम्म सञ्चालन तालिका छ ।

तस्बिरहरू : हरिशजंग क्षेत्री/बाह्रखरी