काठमाडौं । राष्ट्रिय प्रजातन्त्र पार्टी (राप्रपा)का वरिष्ठ नेता उपाध्यक्ष बुद्धिमान तामाङले आफ्नो पार्टी धर्मको सन्दर्भमा अतिवादी नभएको दाबी गरेका छन् । मंगलबार काठमाडौंमा आयोजित राप्रपाको आन्दोलन केन्द्रित प्रशिक्षक प्रशिक्षण कार्यक्रममा उनले आफूहरू परम्परावादी शक्ति भए पनि उदार भएको जिकिर गरे ।

"हाम्रो यो पार्टी धर्म, संस्कृति, संस्कार, परम्पराको जगमा गठन भएको हो । यसपछि राष्ट्रियता, प्रजातन्त्र, उदारवाद जुन नारा छ, हामी राष्ट्रवादी हौँ । या प्रजातन्त्रप्रति प्रतिबद्ध छौँ । मान्छेहरूले हामीलाई परम्परावादी शक्ति भन्छन्, हामी लिबरल (उदार) छौँ । हामी अतिवादी धर्मवादी होइनौँ," उनले भने ।

आफूहरू सबैलाई धार्मिक स्वतन्त्रता हुनपर्ने पक्षमा रहेको तर पहिचानका लागि हिन्दुराष्ट्र हुनुपर्ने उनको भनाइ छ ।

"हामी हिन्दुवादी राज्यको कुरा गर्छौं । हामी अतिवादी धर्ममा विश्वास गर्दैनौँ । हामी उदारवादमा विश्वास गर्छौं । सबैलाई धार्मिक स्वतन्त्रता हुनुपर्छ । पहिचानलाई हिन्दुराष्ट्र हुनुपर्छ भनेर हामी अगाडि बढेका छौँ," उनले भने ।