काठमाडौं । चालु आर्थिक वर्ष २०८१/०८२ को दुई महिनामा दुई खर्ब ६२ अर्ब ५४ करोड रुपैयाँको वस्तु तथा सेवा आयात भएको छ । तर, सोही अवधिमा २५ अर्ब नौ करोड रुपैयाँको वस्तु तथा सेवा निर्यात भएको छ ।

गत आर्थिक वर्षको दुई महिनामा आयात भएको तुलनामा यो वर्षको सोही अवधिमा आयात १.०८ प्रतिशतले वृद्धि भएको छ । गत वर्षको साउन र भदौमा दुई खर्ब ५९ अर्ब ७४ करोड रुपैयाँको वस्तु तथा सेवा आयात भएको थियो ।

त्यस्तै, गत वर्षको साउन र भदौमा भएको निर्यातको तुलनामा यो वर्षको सोही अवधिमा निर्यात ५.१२ प्रतिशतले घटेको छ ।

आयात बढ्दा र निर्यात घट्दा देशको व्यापार घाटा १.७८ प्रतिशतले बढेको छ । भन्सार विभागका अनुसार साउन र भदौमा मात्र नेपालको व्यापार घाटा दुई खर्ब ३७ अर्ब ४४ करोड रुपैयाँ कायम भएको छ । गत वर्षको भदौ मसान्तसम्म देशको व्यापार घाटा दुई खर्ब ३३ अर्ब ३० करोड रुपैयाँ थियो ।

विभागका अनुसार भदौ मसान्तसम्म नेपालको वैदेशिक व्यापार कुल दुई खर्ब ८७ अर्ब ६३ करोड ५७ लाख रुपैयाँ पुगेको छ । गत वर्षको भदौसम्म यस्तो व्यापार दुई खर्ब ८६ अर्ब १९ करोड ६९ लाख रुपैयाँ थियो ।