काठमाडौं । राइडर दीपककुमार साहले र्‍याली अफ हिमालयजको चौथो संस्करणमा नेपालको प्रतिनिधित्व गर्ने भएका छन् ।

यसै असोज १६ गतेदेखि २० गतेसम्म भारतमा आयोजना हुने र्‍यालीमा साहले रोयल इन्फिल्ड हिमालयन चलाएर नेपालको प्रतिनिधित्व गर्ने रोयल इन्फिल्ड नेपालले जनाएको छ ।

यो र्‍याली रोमाञ्चक अफरोड मोटरस्पोर्ट इभेन्ट चुनौतीपूर्ण भू–भाग, अप्रत्याशित मौसम र हिमालयन मार्गका लागि प्रसिद्ध रहेको बताइएको छ ।

साहले रोयल इन्फिल्ड हिमालयन ४११ चलाउने भएका छन् । कम्पनीका अनुसार यो स्थायित्व, कठोरता, र कठिन परिस्थितिमा प्रदर्शनको लागि परिचित छ।

अन्तर्राष्ट्रिय इभेन्टका रूपमा रहेको र्‍याली अफ हिमालयजले संसारभरका शीर्ष राइडरलाई आकर्षित गर्ने र राइडरको सिप र मेसिनको सहनशीलतालाई पृथ्वीको चरम भू–भागमा परीक्षण गर्ने प्लेटफर्मको रूपमा काम गर्ने कम्पनीले जनाएको छ ।

साहले यो प्रतिष्ठित इभेन्टमा नेपालको प्रतिनिधित्व गर्न पाएकोमा सम्मानित महसुस गरेको बताएका छन् । उनले नेपाललाई मोटरस्पोर्टबाट विश्वभर चिनाउन चाहेको बताए ।

दीपक साहले सुरुदेखि नै रोयल इन्फिल्ड मोटरसाइकल चढ्दै आएको कम्पनीले जनाएको छ । उनका बुवासँग सन् १९८० देखि नै रोयल इन्फिल्डको मोटरसाइकल रहेको र त्यसैले उनलाई पनि रोयल इन्फिल्डप्रति आकर्षण रहेका कम्पनीले जनाएको छ ।

दीपक साह सन् २०१७ र २०१८ मा समेत रेड द हिमालयजमा भाग लिएका थिए । त्यसैगरी, २०२२ मा र्‍याली अफ चाम्बामा समेत सहभागी भएका थिए । उनी रोयल इन्फिल्ड क्याटागोरीमा सन् २०१८ को रेड द हिमालयज र्‍याली अफ चाम्बाको विजयी समेत बनेका थिए ।