काठमाडौं । अमेरिकाले त्यहाँका गाडीमा चिनियाँ सफ्टवेयरको प्रयोगमा प्रतिबन्ध लगाउने भएको छ । वाणिज्य विभागले ‘केनक्टेड’ तथा ‘अटोनोमस–स्वचालित’ गाडीमा चिनियाँ सफ्टवेयर र हार्डवेयरको प्रयोगमा प्रतिबन्ध लगाउने जनाएको छ ।

अमेरिकी राष्ट्रपति जो बाइडेन प्रशासनले राष्ट्रिय सुरक्षाको खतारालाई लिएर प्रतिबन्ध लगाउने तयारी गरेको बताइएको छ । चिनियाँ कम्पनीले इन्टरनेट र नेभिगेसन प्रणालीजडित गाडीमा निगरानी र ड्राइभर तथा पूर्वाधारको डाटा संकलन गर्ने चिन्ता बाइडेन प्रशासनको छ ।

यो प्रतिबन्धले महत्त्वपूर्ण सञ्चार, स्वचालित ड्राइभिङ सिस्टम सफ्टेवयर तथा हार्डवेयर भएका चिनियाँ गाडीको आयात र बिक्रीमा रोक लगाउनेछ । यो कदमलाई चिनियाँ गाडी, सफ्टवेयर तथा कम्पोनेन्टमा अमेरिकी प्रतिबन्धको थप निरन्तरताका रूपमा हेरिएको छ ।

गएको साता मात्र बाइडेन प्रशासनले चीनबाट गरिने आयातमा कर बढाएको छ । ईभी गाडीमा १०० प्रतिशत कर तोकिएको छ । ब्याट्री र महत्त्वपूर्ण खनिजको आयातमा पनि कर बढाइएको छ । रोयटर्सबाट ।