कैलाली । कैलालीमा भन्सार छली गरी ल्याइएका नौ लाख रुपैयाँबराबरका सामान बरामद गरिएको छ । जिल्लास्थित विभिन्न स्थानमा रहेका भारतीय नाकाबाट भन्सार छली गरी ल्याइएका नौ लाख एघार हजार ११० रुपैयाँबराबरका अवैध सामान शनिबार प्रहरीले बरामद गरेको हो ।

जिल्ला प्रहरी कार्यालयका प्रहरी नायब उपरीक्षक कविन्द्रसिंह बोहराका अनुसार, धनगढीबाट करिब पाँच लाख पाँच हजार ७८० बराबरको किराना सामान, तामा–पित्तलका भाँडा, मिठाई, प्याज र प्लास्टिक तथा भजनीबाट दुई लाख ३० हजार मूल्यबराबरको प्याज, मोटरसाइकल र चिनी बरामद गरिएको छ ।

टीकापुरबाट एक लाख ३२ हजार ७३० बराबरको किरानाका सामान, प्लास्टिकका खेलौना, शृंगारका सामान, चिनी र प्याज, गोदावरीबाट २६ हजार ६०० बराबरको कपडा र कैलारी गाउँपालिकाबाट १६ हजारबराबरको बोइलर कुखुरा बरामद गरिएको उनले जानकारी दिए ।

बरामद गरिएका अवैध मालसामानसहित पक्राउ परेका सबैलाई आवश्यक कारबाहीका निम्ति भन्सार कार्यालय पठाउने तयारी भइरहेको प्रहरी नायब उपरीक्षक बोहराले बताए । रासस